Pontón promete unha oposición "firme" tras "un dos pasos máis importantes do nacionalismo na última década"

A candidata á Presidencia da Xunta do BNG, Ana Pontón, prometeu unha oposición "firme e rigorosa", con "proxectos e alternativas" nesta lexislatura, tras unhas eleccións autonómicas nas que cree que "o nacionalismo galego deu un dos seus pasos adiante máis importantes na última década".

En rolda de prensa despois de que a Executiva Nacional do BNG haxa analizados os resultado electorais, Pontón asegurou que nos próximos catro anos vai estar "non só o Parlamento" nas rúas, senón as rúas no Parlamento", co Bloque potenciando o activismo e ao lado dos "problemas do día a día".

Tras dar as grazas a todos os votantes do Bloque e aos que participaron na campaña, Pontón sinalou que o "entusiasmo foi a clave" para que o BNG puidese "recuperar posicións", con seis deputados e case 120.000 votos, fronte a unhas enquisas que auguraban un escenario máis negativo.

Así, dixo ser consciente da "esperanza e ilusión" xerada en "miles de persoas" que depositaron a súa confianza no BNG, polo que promete que os seus votos servirán para construír "unha alternativa de futuro para Galicia", "coa apertura dunha nova etapa do nacionalismo galego" que ten como fin arrebatar ao PP o bastón de mando.

Todo iso nunha xornada na que o BNG celebrou cunha torta os 34 anos da asemblea constituínte do Bloque en Riazor, un 26 de setembro de 1982.

"O BNG PARTÍA DUNHA POSICIÓN MOI DIFÍCIL"

Se ben recoñeceu que os resultados das eleccións non foron os esperados para un cambio na Xunta, Pontón ve positivo que hai "unha base sólida sobre a que construír un camiño diferente". "O BNG partía dunha posición moi difícil e creo que conseguimos un resultado excepcional no contexto no que estabamos a traballar", sostivo.

Pontón achaca os resultados do Bloque a que se fixo "unha campaña ilusionante, creativa, en positivo". Para a líder nacionalista, iso indica que "o importante" foi "os afectos" de miles de persoas que crían nun "proxecto" e "saíron á rúa a defendelo cun sorriso".

Nesta tarefa que afronta o BNG, considera que "é necesario un novo impulso", co fin de que "a maioría social" de Galicia "teña unha alternativa de futuro e esperanza" para alcanzar un proxecto "sólido" nas próximas eleccións para un cambio de goberno na Comunidade.

REFUNDACIÓN NUN "ESPAZO CLARAMENTE NACIONALISTA"

A preguntas sobre como afectan os resultados electorais ao proceso de refundación iniciado hai uns meses polo Bloque, Pontón dixo que se vai continuar co marcado", con "xenerosidade e humildade".

Para iso, seguirase un camiño "aberto, de diálogo, de debate" e de "apertura da organización", nun proceso de refundación que "agora se retoma" cunha "base sólida", xa que "hai un espazo claramente nacionalista, que nestas eleccións se define con claridade".

Nesta liña, Pontón avoga por "fortalecer o proxecto nacionalista", cun BNG "inclusivo", "onde ten cabida todas as persoas que queiran sumar para construír unha Galicia mellor, con futuro".

De tal forma, Pontón afirma que o Bloque "ten un folla de ruta trazada", cun "proxecto serio e solvente", cunha organización "forte e cohesionada", tras anos de escisións. "Neste momento collemos aire nas candeas, iso supón un novo impulso para unha nova etapa", remarcou.

"A POR TODAS" SE HAI XERAIS DE NOVO

Sobre a situación política estatal, Pontón censura, que o que acontece en España "é unha absoluta irresponsabilidade", debido á "incapacidade da esquerda para chegar a acordos" e ao "inmobilismo" da dereita. "Estou convencida de que se dimitisen os cuatros líderes das principais forzas políticas quizais non nos veriamos abocados a unhas terceiras eleccións", sentenciou.

No tocante a este extremo, referiuse a que "non está despexada a dúbida de se vai haber ou non unhas terceiras eleccións xerais", pero no caso de que se produzan o BNG vai ir a por todas", cun traballo "intenso", despois dun tempo no que "Galicia perdeu presencia" no Estado.