Por Galicia Confidencial | Vigo | 17/10/2016 | Actualizada ás 12:04
A fotografía 'Viperfish (Chauliodus sloani)', tomada polo biólogo vigués Álvaro Roura Labiaga, foi seleccionada por un xurado de expertos en microscopía e científicos como unha das 100 mellores imaxes do certame internacional Nikon Small World.
Actualmente, esta fotografía ocupa a segunda posición no concurso, pola que se pode votar ata o 25 de outubro nesta ligazón: https://nikonsmallworld.strutta.me/entries/142306. O resultado da votación popular farase público o 26 de outubro, a través de Instagram (@NikonInstruments).
A fotografía foi tomada en 2009, durante unha campaña fronte as costas galegas no marco da tese doutoral de Álvaro Roura, realizada no Instituto de Investigacións Mariñas (IIM), do CSIC.
A fotografía tomouse a bordo do buque oceanográfico Sarmiento de Gamboa, cunha cámara adaptada ao ocular dun microscopio e mostra con detalle as principais armas do peixe víbora.
"As profundidades mariñas son o ecosistema máis extenso do planeta Terra. Neste reino de escuridade líbranse batallas inusuais onde a luz é, ao mesmo tempo, a principal arma e a mellor defensa. Un dos actores desta batalla lumínica é o peixe víbora (Chauliodus sloani), un feroz depredador das profundidades. Os seus dentes son os máis grandes do reino animal. Con todo, a súa principal arma é o pequeno órgano luminoso de cor azulado situado baixo o seu ollo. Este órgano produce unha luz vermella que é totalmente invisible para as súas presas, xa que ás profundidades nas que vive (100-500 metros) só existe unha tenue luz azul?, explica Álvaro Roura sobre a súa imaxe.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.