Mellorar o control dos viñedos co uso de drons

A Axencia Galega de Innovación deu luz verde ao proxecto de investigación 'Ecovine', unha iniciativa que pretende desenvolver "unha metodoloxía innovadora baseada en novas tecnoloxías para segmentar ou zonificar viñedos cunha alta precisión e resolución espacial", segundo informa a Corporación Hijos de Rivera.

Liderado pola adega Ponte da Boga da man da Universidade de Santiago de Compostela e o CSIC, este proxecto persegue "facilitar a xestión e manexo integral dos viñedos mediante a implantación de sistemas complexos de monitorización e control remoto baseados en plataformas de visualización e análise de datos".

Todo iso se materializa a través da utilización un sistema de captación de información a bordo de aeronaves non tripuladas, con sensores multiespectrais. Esta tecnoloxía realizará "unha exhaustiva análise de toda a superficie do viñedo: a súa variabilidade, o seu estado hídrico, o desenvolvemento da planta e a calidade da uva", explica Hijos de Rivera.

MELLORAR OS TRATAMENTOS

Ademais, engade que todos estes parámetros, canalizados a través dunha web que procese axeitadamente os datos, "proporcionarán unha información moi útil que facilitará a decisión sobre o momento óptimo para a vendima, os tratamentos a aplicar a cada zona do viñedo en cada momento ou a necesidade de rego baseándose en modelos de eficiencia enerxética".

Para levar a cabo esta iniciativa, a adega Ponte da Voga estableceu un consorcio coa Adega Lar de Ricobao, e as empresas tecnolóxicas Elmantec e Teican Medioambiental.