USO denuncia a contratación para Inspección de Traballo dunha empresa investigada por fraude

O sindicato USO vén de denunciar que o Ministerio de Emprego e Seguridade Social adxudicou o contrato de vixilancia e seguridade para as dependencias das Inspecciónes de Traballo das provincias da Coruña, Lugo, Ourense e Pontevadra á empresa Alcor Seguridad por un período de doce meses. O secretario de organización da Federación de Seguridade de USO, Iván Blanco, denuncia esta concesión da Administración, "ao estar esta empresa investigada por fraude á Facenda pública e á propia Seguridade Social, ademais de existir causas abertas por delitos contra os traballadores contra Alcor Seguridad". 

Esta contratación, critica Blanco, "é un exemplo máis de que as administracións públicas son as primeiras en «premiar» a este tipo de empresas incumplidoras dos convenios colectivos e dos dereitos dos traballadores". 

Ademais, o representante de USO cualifica de "paradoxal" esta contratación por parte dunha administración que "incoou multitude de expedientes a esta compañía de seguridade e ten o deber de facer respectar a normativa vixente en materia de traballo".

A Federación de Traballadores de Seguridade de USO, anuncia mobilizacións ante estas instalacións do Ministerio dentro da súa campaña contra as "empresas piratas" para protestar contra este tipo de contratacións e esixir a inclusión de clausulas sociais nos contratos públicos que eviten estas situacións.