A Xunta reivindica a importancia de fomentar o emprendemento innovador para xerar empregos cualificados

A secretaria xeral de Emprego, Covadonga Toca, visitou este venres no edificio Emprendia de Santiago as instalacións da empresa Situm Technologies, recoñecida como Iniciativa de Emprego de Base Tecnolóxica (IEBT) e é "un referente de emprendemento innovador", destacando a súa aposta polo deseño e desenvolvemento de sistemas de localización e navegación en interiores para 'smartphones'.

A compañía santiaguesa desenvolveu, entre outros proxectos, unha aplicación para o Sergas, que permite, a través dun sistema de navegación, desprazarse por centros hospitalarios como o Álvaro Cunqueiro de Vigo e o Lucus Augusti de Lugo.

A secretaria xeral de Emprego destacou o impulso da Xunta a este tipo de empresas para promover os postos de traballo estables e de calidade.

Neste sentido, recordou que este ano se concederon axudas por máis de 300.000 euros, enmarcadas dentro deste programa de apoio ao sector.

A través desta iniciativa, o obxectivo é fomentar o espírito innovador e emprendedor, principalmente entre os investigadores e titulados universitarios de calquera área de coñecemento científico, técnico ou humanístico. Durante este ano, a Xunta recoñeceu 14 iniciativas de emprego de base tecnolóxica (IEBT).