Axudas polo galego: La Voz e Faro suman un millón; toda a prensa dixital en galego 3.400€
A Xunta publicou o último día hábil do ano a resolución das súas subvencións aos medios para promocionar a lingua galega. Estas dúas liñas de axudas son faragullas en comparación coas ducias de millóns que reparte cada ano a Secretaría Xeral de Medios a través da publicidade e dos convenios a dedo. Con todo, son moi reveladoras de como o PPdeG e os grandes empresarios da comunicación se apoian mutuamente co diñeiro de todos.
Por Manuel Vilas | Santiago de Compostela | 04/01/2017 | Actualizada ás 08:00
A resolución da subvención para medios integramente en galego -tradicionalmente con liñas editoriais máis críticas co PP- suma 201.000 euros. As subvencións para medios en xeral 1,6 millóns. Esta diferencia de importe prodúcese malia que en teoría as dúas liñas de subvención comparten un fin: apoiar a difusión de noticias en galego.
Regras de xogo a medida
Para cobrar as subvencións, aos medios escritos en castelán chégalles con ceder á lingua propia un pequenísimo espazo: o 8%. Ademais, poden recibir axudas polas súas edicións dixitais.
A convocatoria de axudas para medios en galego crea unha serie de barreiras pola que na práctica case toda a prensa dixital en galego queda excluída. A maioría -salvo Sermos Galiza- non teñen edición impresa, polo que non poden acceder a esta liña de axudas para cabeceiras integramente en galego. Estas axudas, a diferencia das axudas aos medios en castelán, só se dan para ediccións en papel, malia que hai lustros que a prensa dixital ten máis lectores ca prensa escrita.
Ademais, a maioría da prensa dixital en galego tampouco pode acceder á liña de axudas a medios en xeral porque tampouco declaran -salvo Sermos e Pontevedra Viva- máis de cinco traballadores en nómina. Resultado: a prensa dixital en galego suma pouco máis 3.400 euros de axudas (1.200 de Sermos e 2.200 de Pontevedra Viva).
Medios en castelán con menos audiencia cobran máis que medios en galego con máis audiencia
Así as cousas, o resultado final destas convocatorias é totalmente contrario ao que se pretende, polo menos en teoría. Grandes medios que discriminan o galego reciben importantísimas subvencións por promocionaren a lingua proia. Salvo o 25 de Xullo, cabeceiras como La Voz de Galicia (718.000 €) ou Faro de Vigo (305.000 €) relegan o idioma propio aos artigos de opinión e ás veces de cultura.
Pola contra, os medios dixitais en galego con importantes audiencias (por exemplo GC, Praza Pública, Que Pasa na Costa, Xornal do Val Miñor, etc.) non ven un peso. Por, en teoría, apoiaren o galego cobran incluso cabeceiras que son case exclusivamente en castelán e que, de acordo aos rankings de Alexa, teñen menos lectores que, por exemplo, GC. Por citar dous, Atlántico Diario (22.000 euros a través de Rías Baixas Comunicación) ou El Ideal Gallego e Diario de Ferrol ( 33.000 € a través de Editorial la Capital).
Nin rastro de El Correo Gallego
A continuación figuran os importes recibidos por cada empresa nas dúas liñas de subvención. O criterio para establecer as cantidades é a difusión que cada medio di ter. Sorprende tamén a total ausencia das cabeceiras de Editorial Compostela (Radio Obradoiro, El Correo Gallego) Outro dos requerimentos era estar ao día do pago dos impostos.
LIÑA DE AXUDAS A MEDIOS EN XERAL (co compromiso de publicaren o 8% en galego os escritos e emitir o 50% en galego as radios)
| Beneficiaria | Importe |
| Radio Lugo, SA (Cadena Ser) | 56,74 |
| Radio Ourense, SA (Cadena Ser) | 872,43 |
| Europa Press Delegaciones, SA | 1007,74 |
| Sermos Galiza, SA | 1226,38 |
| Virtual Vedra Comunicación, SL (Pontevedra Viva) | 2237,68 |
| Radio Pontevedra, SA (Cadena Ser) | 12491,26 |
| Rías Baixas de Comunicación (Atlántico Diario) | 22403,36 |
| Editorial La Capital (El Ideal Gallego, Diario de Ferrol, Diario de Arousa, DxT) | 33555,87 |
| Voz de Galicia Radio, SLU | 43315,67 |
| La Opinión de La Coruña, SLU | 47940,61 |
| Uniprex, (Onda Cero) | 69870,22 |
| Lérez Ediciones, (Diario de Pontevedra) | 70088,17 |
| La Región, SA | 70575,79 |
| El Progreso de Lugo, SL | 135263,36 |
| Radio Popular, COPE | 139908,77 |
| Faro de Vigo, SAU | 305686,04 |
| La Voz de Galicia, SA | 718499,91 |
| TOTAL | 1.675.000 |
LIÑA DE AXUDAS A MEDIOS ÍNTEGRAMENTE EN GALEGO (só para medios impresos en papel e 100% en galego RAG)
| Beneficiaria | Publicación | Importe |
| Atlántica de Información e Comunicación de Galicia, SA | Tempos Novos | 7540.75 |
| Félix Jorquera Caselas, SL | Terra Chá Xa | 7569.51 |
| Luzes, Xornalismo que Conta, SL | Revista Luzes | 7572.36 |
| Ediciones Edisport, SLL | A Louriña | 7573.47 |
| Ediciones Edisport, SLL | Vigo Deportivo | 7573.47 |
| Libre Expresión de Medios de Galicia, SL | Revista Amsgo! | 7699.84 |
| Conde Miranda, Ana | Teovivo | 7713.7 |
| Arrincamos, SL | Sprint Motor | 7978.68 |
| Underwood Media, SL | Crónicas | 7979.83 |
| Publicaciones Tameiga, SL | A Nova Peneira | 8116.41 |
| Publicaciones Tameiga, SL | Hermes e Atenea | 8116.41 |
| Garherve, SL | O Sil Ano 2000 | 8173.32 |
| Grupo Código Cero Comunicación, SL | Código Cero | 8251.28 |
| Publicidade Terceiro Milenio, SLU | Xornal 21 | 8490.29 |
| Adelaida Domínguez Mariño | Xornal Galicia Sur Ourense | 8655.86 |
| Xornal Galicia Norte A Coruña, SL | Xornal Galicia Norte A Coruña | 8655.86 |
| Letras a la Carta, SL | Barrios Xinzo-Verín-Allariz-Celanova | 8662.74 |
| Grupo Distribuciones Asesor Marketing Publicitario, SL | Xornal Galicia Sur Pontevedra | 10021.68 |
| Letras a la Carta, SL | Ourense por Barrios | 10142.37 |
| Letras a la Carta, SL | Barrios Deportivo | 13311.14 |
| Sermos Galiza, SA | Sermos Galiza | 31542.03 |
| TOTAL | 201.341 |
