A Casa da Muller de Lugo atendeu unhas 10.000 consultas nos dous últimos anos

A alcaldesa de Lugo, a socialista Lara Méndez, puxo en valor o traballo que se realiza na Casa da Muller, con nove traballadores, que nos dous últimos anos "atendeu en torno a 10.000 consultas".

Son "consultas" de "toda índole", segundo manifestou a rexedora, se ben apuntou que "o 38 por cento delas están relacionadas coa violencia de xénero".

"Isto evidencia a necesidade de apostar por este tipo de centros, de apostar pola igualdade e de seguir loitando contra esta lacra social que o pasado ano se levou por diante a 44 mulleres que foron asasinadas a mans das súas parellas ou exparellas, e no que levamos de ano xa son catro mulleres con nomes e apelidos que tamén foron asasinadas. Por iso é fundamental apostar pola igualdade e non formular recortes nesta materia", reivindicou.

Estes datos achegounos pouco antes de participar nunha visita ao centro coa secretaria xeral de Igualdade, Susana López Abella. "A Xunta o que fai é colaborar e agradecer ao Concello de Lugo a coordinación que mantemos en algo que é tan importante como a igualdade de oportunidades e a loita contra a violencia de xénero", sinalou López Abella.

Tamén detallou que o Goberno galego "cofinancia todos os anos esta Casa da Muller, ademais da Casa de acollida de Lugo que é de titularidad municipal".

Así debullou que a Xunta "inverteu" dende 2009 "ata o día de hoxe preto de 300.000 euros" para axudar ao mantemento do centro e o persoal especializadísimo". "E, en canto á rede de pisos, onde tamén colaboramos cunha axuda que chega preto dos 381.000 euros,", segundo concretou.

"Para nós é moi importante a atención ás usuarias, a violencia de xénero que, lonxe de atallarse, aparecen novas formas na xente máis nova e isto só podémolo atallar en colaboración entre a administración local, a autonómica e, por suposto, a provincial. Deben estar todos a un", concluíu Abella.