Aberta a matrícula gratuíta en dous novos obradoiros da USC para a busca de emprego
Trátase dos obradoiros ‘Emprego 2.0: o uso das redes Sociais e ferramentas TIC na busca de emprego’ e ‘Elabora o teu plan de acción: técnicas para mellorar a eficacia na busca do teu primeiro emprego’.
Por GC Emprende | Compostela | 22/03/2017 | Actualizada ás 11:00
A Área de Orientación Laboral da USC mantén a matrícula aberta en dúas novas actividades gratuítas para este mes de marzo do seu Programa de Formación para a Empregabilidade.
Por unha banda, o 24 de marzo terá lugar o obradoiro ‘Emprego 2.0: o uso das redes Sociais e ferramentas TIC na busca de emprego’ no que se achegarán os recursos máis innovadores que se poden atopar a través de internet ou noutros dispositivos dixitais. Será en horario de mañá na Facultade de Bioloxía.
Na mesma facultade o día 28 desenvolverase, tamén pola mañá, a xornada ‘Elabora o teu plan de acción: técnicas para mellorar a eficacia na busca do teu primeiro emprego’, coa que se pretende amosar a operativa de captación de talento que fan as empresas, departamentos de RRHH e consultoras de selección, así como identificar e definir as posibles estratexias para buscar emprego.
