A estratexa e os apoios de Louzán

Ponteareas, Mos, Nigrán, Silleda, Porriño... As conquistas de Louzán son numerosas e teñen o seu premio; nas alcaldías recuperadas viven máis de 70.000 persoas, un importante segmento da poboación que os populares queren conservar para manter a presidencia da deputación. E nesta guerra, todo vale, mesmo convencer aos candidatos do propio partido para que se retiren e deixar paso, deste xeito, aos candidatos independentes. No medio, promesas de todo tipo; postos no Parlamento e na Xunta, tal e como aconteceu con Nava Castro, filla do ex alcalde de Ponteareas, e lle sucederá a Gonzalo Ordóñez, de Independentes por Porriño. Unhas decisións que contan co respaldo de Alberto Núñez Feijóo.

O exemplo máis recente é o do Porriño, todo unha operación de inxeñería. Louzán necesitou meses para recompoñer a unidade da dereita neste concello xa que as diferencias entre Nelson Santos, o novo alcalde, de Ciudadanos por Porriño, e Gonzalo Ordoñez, líder de Independientes por Porriño, eran case insalvables. Santos escindiuse do partido de Ordoñez na lexislatura pasada, precisamente, por problemas persoais. Por iso, Louzán tivo que fiar fino. Santos só apoiaría a moción se era alcalde e se non tiña con el a Ordóñez. Por iso, o presidente da deputación provincial tivo que convencer a Ordóñez para deixar a política municipal e prometerlle un cargo na Cámara. A operación tivo que pecharse cun notario de por medio. O mesmo aconteceu en Ponteareas e en Silleda.

"Doble rasero"

Precisamente, as prácticas que a dirección popular ten criticado en Ourense durante a pasada campaña á presidencia provincial deste partido repitense en Pontevedra sen que ninguén na Nécora diga nada. Nalgunha ocasión, mesmo son propiciadas e consensuadas dentro da dirección popular. Por iso, sectores deste partido en Ourense e de Pontevedre critican o "doble rasero" de Feijóo e do seu equipo. "Por unha banda din que nós somos uns caciques e logo eles fan o mesmo en Pontevedra con Louzán á cabeza", apunta un dirixente consultado.

E é que Louzán conta coa total confianza de Alfonso Rueda e do propio Feijóo desde que se volcou co actual presidente da Xunta na sucesión polo liderazgo do PPdeG. Daquela, Louzán remitiu unha carta a todos os alcaldes populares de pontevedra pedindo o voto para Núñez Feijóo; unha práctica que a dirección popular criticou duramente no proceso ourensán acusando a José Luis Baltar de coaccionar aos militantes.