A Xunta defende a conexión da AP-9 coa Vía Ártabra na Gándara por achegar "maior seguridade e menor afección"

O director da Axencia Galega de Infraestruturas, Francisco Menéndez, defendeu a conexión da autoestrada AP-9 coa Vía Ártabra na Gándara porque achega, segundo dixo, "maior seguridade e menor afección".

Respondeu así ás críticas do viceportavoz de AGE, Antón Sánchez, quen, nunha pregunta na comisión de obras públicas, sinalou que o seu grupo discrepa de que ese sexa "o único punto posible", e lembrou a desconformidade do Concello de Cambre.

"Os técnicos consideran que é o único caso no que o Concello pide a alternativa de maior afección: Catro Camiños en lugar da Gándara. Causa certa perplexidade", subliñou o responsable da axencia de infraestruturas, na súa quenda.

Por iso, Menéndez, na súa intervención, apuntou que a administración autonómica está "a tentar levar adiante este proxecto, que dá sentido --dixo-- ao investimento feito ata agora".

Por outra banda, atendeu ás cuestións de Sánchez sinalando que o proxecto construtivo "non conta e non prevé" que haxa unha área de peaxe.

ACCESO AO PORTO DE LORBÉ

Na mesma comisión, o deputado do BNG Xosé Luís Rivas 'Mini' interrogou tamén a Menéndez sobre o último tramo da Vía Ártabra, que dá acceso ao porto de Lorbé.

O responsable da Axencia felicitouse de que este luns entrou en servizo, e valorouna como unha actuación "longamente esperada", que se viu afectada por "vicisitudes" que afectaron o prazo "máis aló" do que a Xunta querería.