CIG e CUT convocan paros parciais na auxiliar viguesa de automoción Faurecia-Asientos

As seccións sindicais de CIG e CUT na auxiliar viguesa de automoción Faurecia-Asientos de Galicia convocaron paros parciais esta semana como medida de denuncia polos "incumprimentos" en materia de seguridade e saúde laboral, e o aumento nos ritmos de produción.

Segundo informaron fontes sindicais, os paros terán lugar este mércores, xoves e venres e distribuiranse ao longo da xornada: de 11.00 a 14.00 horas na quenda de mañá, de 14.00 a 17.00 horas na quenda de tarde, e de 22.00 a 01.00 horas na quenda de noite.

Con esta medida, que irá acompañada de concentracións de protesta ás portas da factoría (situada no parque tecnolóxico e loxístico de Valadares) os convocantes pretenden denunciar a "marxinación da saúde laboral" na planta, ademais da presión que soporta o persoal polo aumento da produción.

A CIG, de feito, lembrou que estas eran algunhas das cuestións que lle levaron, xunto con CUT e CSIF, a rexeitar a finais do ano pasado o preacordo de convenio alcanzado polo resto de sindicatos (CC.OO., UXT e CXT) coa empresa.