Ignacio Echeverría, desaparecido tralo atentando en Londres, é natural de Ferrol
Viviu durante moitos anos nas Pontes. A última vez que foi visto estaba tendido na beirarrúa tras enfrontarse aos terroristas co seu monopatín.
- As autoridades británicas pediron as impresións dixitais de Ignacio Echeverría para tentar identificalo
- Santamaría: "Estamos en contacto con autoridades británicas para pescudar canto antes o paradoiro de Echeverría"
Por Galicia Confidencial | Santiago de Compostela | 05/06/2017 | Actualizada ás 18:22
Ignacio Echeverría, desaparecido en Londres desde o atentado do pasado sábado pola noite, naceu hai 39 anos en Ferrol e foi veciño das Pontes (A Coruña), onde residiu ata que se mudou para ir á universidade. En concreto, segundo indicou o Concello das Pontes, Ignacio é fillo dun enxeñeiro que traballou moitos anos en Endesa, ata que as obrigacións laborais o levaron a cambiar de destino.
Ademais, segundo publicou a súa familia a través das redes sociais, mide 1,75 metros de altura e pesa uns 85 quilos. A última vez que foi visto estaba tendido na beirarrúa tras enfrontarse aos terroristas co seu monopatín.
Como sinalou tamén o Concello pontés, Echeverría golpeou a un dos asaltantes co seu monopatín, tras o cal foi derrubado.
Polo momento descoñécese o seu paradoiro, posiblemente tamén debido a que, como viña de facer deporte, ía sen documentación. O Goberno español asegurou que se está facendo "todo o humanamente posible" para localizalo.
