Ecoloxistas critican que se tardase 10 anos en controlar o fluxo de turistas ás Cíes

A polémica das últimas semanas polo turismo desordenado nas Cíes puxo de manifesto, para os grupos ecoloxistas, que se estaba incumprindo de xeito reiterado o cupo de visitantes ás illas. Un incumprimento, din, que se remonta hai dez anos.  “Alegrámonos de que por fin o problema saia á luz pública e se comecen a tomar medidas adicionais para impedir os incumprimentos. Mais a responsabilidade desta situación non é unicamente desas navieiras, ás que parece que non lles importa matar a galiña dos ovos de ouro que para elas representa o Parque Nacional, senón tamén das autoridades, polo desleixo co que veñen actuando ano tras ano respecto a este tema”, apuntan.

Nun comunicado conxunto  ADEGA, APDR, FEG, Rede de Colectivos  A Ría non se Vende, Salvemos Monteferro, Verdegaia  e  Voces Polo Litoral lembran que o ecolismo alertou xa en 2014 que se estaba excedendo o cupo de visitantes ás Cíes.  “Entón o Director-Conservador do Parque Nacional, José Antonio Fernández Bouzas, sacoulle importancia a este dato negando ningún tipo de exceso de cupo”, lembran.

Dende 2011 lévanse presentado arredor de 120 denuncias ás navieiras por exceso de cupo e ningunha superou a contía de 12.000 euros. Por iso, os ecoloxistas lembran que, coa lei na man, poderíanse ter imposto sancións de ata 200.000 euros e incluso unha retirada temporal da concesión. “Isto está en sintonía coa tibieza do Parque Nacional á hora de sancionar actividades non permitidas ou ilegais tais como a entrada en zonas de reserva, a pesca deportiva en augas do espazo protexido...”, destacan. 

Algunhas das varias navieiras vendían, ata agora, billetes de xeito descontrolado, chegando nos momentos máis álxidos da tempada turística a dobrar o número permitido. Por iso, o Movemento Ecoloxista insta á Administración a que garanta un control máis rigoroso do número de billetes vendidos.

Neste sentido apuntan que os esforzos das administracións co Parque Nacional deben  ir máis encamiñados á conservación dos seus ecosistemas que a presentar ás illas exclusivamente como destino turístico. “A principal finalidade dun Parque Nacional é a conservación dos seus valores naturais fráxiles ou singulares, e a ela deben supeditarse todas as medidas de xestión”, engaden.

Outras medidas

Ademais, piden a aprobación do Plano Reitor de Uso e Xestión que leva agardando desde hai 14 anos. Tamén reclaman aumentar a dotación de persoal que efectúa labores de vixilancia e información durante o verán. En non poucas ocasións tan só hai unha guía para as 3.000 persoas que visitan o arquipélago de Cíes durante os meses de xullo e agosto.

Tamén piden máis investimentos en conservación, especialmente no control de flora exótica invasora, e un maior número de estudos e actuacións para frear o declive de especies ameazadas como o corvo mariño cristado que pese a ser o emblema do Parque Nacional, rexistrou nos últimos anos un grande declive poboacional no espazo protexido.