A recollida de lixo e a subministración de auga, os servizos públicos municipais mellor valorados en Vigo

A recollida de lixo é o servizo público mellor valorado en Vigo, segundo o estudo realizado polo Observatorio de Servizos Urbanos (OSUR) a través dunha enquisa efectuada por Ipsos.

Así, o 67 por cento dos vigueses enquisados afirma estar satisfeito coa recollida de lixos e o 72%, co conxunto dos servizos municipais, mentres que só o 13% móstrase insatisfeitos. Con estes resultados "Vigo sitúase moi por encima da media nacional do 62% e 21%, respectivamente", reflicte esta barómetro.

Tras a recollida de lixo, os servizos mellor valorados son a subministración de auga, co 64% de aceptación; a limpeza viaria co 63%; o coidado de parques e xardíns, co 56% e, en último lugar, o transporte público, que recibe un 51% de opinións positivas e un 22% de negativas. En Vigo todos os servizos superan o 50% de satisfacción.

Respecto da recollida de lixos, o servizo mellor valorado cun 67%, o máis apreciado é a frecuencia do servizo de recollida, cun 90% de opinións positivas. Séguelle a dotación e o equipamento para a prestación do servizo, cun 80% e o servizo de colectores para recollida selectiva cun 69%.

Na subministración de auga, cun índice de satisfacción do 64%, o aspecto mellor considerado, cun 83% de aceptación, corresponde á calidade da auga fornecida; séguelle a boa xestión con ausencia de cortes, presión e bo funcionamento do contador, cun 80% e o servizo de rede de sumidoiros cun 60% de satisfacción.

Na limpeza viaria, que satisfai a un 63% de enquisados, os aspectos máis apreciados pasan pola dotación e equipamento para a prestación do servizo, cun 72% de satisfacción; a limpeza de beirarrúas e rúas, cun 71%, e a frecuencia coa que se realizan labores de limpeza cun 70%.

PARQUES E TRANSPORTE

O coidado de parques e xardíns e o transporte público representan os servizos peor valorados, cun 56% e un 51% de satisfacción, respectivamente.

No coidado de parques e xardíns, a calidade das instalacións destaca como o aspecto mellor valorado cun 68%. Séguenlle o coidado das zonas verdes e o equipamento dos parques para distintas idades, ambos cun 59%.

En canto ao transporte público, o servizo peor valorado, recibe un 51% de opinións positivas fronte a un 22% de opinións negativas, reflicte o Observatorio OSUR. O que mellor valoran os cidadáns deste servizo é o estado de limpeza e conservación dos vehículos, cun 85% de opinións positivas. A relación calidade/prezo e o acceso aos barrios, cun 48% e un 28% de opinións negativas respectivamente, sitúanse como os aspectos que máis insatisfacción xeran.

VALORACIÓN

Para o director xeral de OSUR, Ramiro Aurín, "os datos revelan que Vigo, unha cidade con forte personalidade, ten unha boa opinión dos seus servizos municipais". "Todos eles sitúanse por encima do 50% de aceptación, e en conxunto bastante por encima da media nacional", apostila.

"O transporte, o peor valorado (51% de satisfeitos), sofre unha moi mala opinión polo acceso aos barrios e do prezo do servizo. Todos os servizos estudados son de xestión privada, supervisados e regulados por un concello forte que consegue un excelente resultado", conclúe.

BARÓMETRO

O Barómetro OSUR é a primeira enquisa de carácter anual centrada en medir os índices de satisfacción e a evolución da valoración cidadá, no seu rol de contribuíntes e usuarios, dos servizos públicos municipais no país.

A mostra inclúe residentes nas 30 cidades máis poboadas do país (Madrid, Barcelona, Valencia, Sevilla, Zaragoza, Málaga, Alcalá de Henares, Alacante, Badalona, Bilbao, Cartaxena, Córdoba, A Coruña, Elxe, Xixón, Granada, L'Hospitalet, Jerez de la Frontera, Móstoles, Murcia, Oviedo, Palma de Mallorca, Las Palmas de Gran Canaria, Pamplona, Sabadell, Santa Cruz de Tenerife, Terrassa, Valladolid, Vigo e Vitoria). Os datos corresponden a 13 comunidades autónomas, con 5.262 enquisados de 18 a 79 anos no mes de xullo deste ano.