Resistencia Galega está viva e pode atentar contra persoas, di a Fiscalía
A publicación dunha web e dun boletín son as bases da Fiscalía General del Estado para argumentar que a banda pode dar un salto cualitativo nas súas accións, malia que en 2016 nada fixo.
Por M.V. | Madrid | 06/09/2017 | Actualizada ás 09:03
Resistencia Galega, aínda que non realizou ningún ataque en 2016, está viva e pode reconstruírse. Esta é a opinión da Fiscalía General del Estado, incluída na súa memoria anual 2017 presentada onte.
Do texto dedúcese que os corpos de seguridade están a vixiar a contorna independentista. Así, aínda que a Fiscalía recoñece que “en 2016 non se produciu ningunha acción terrorista nin tampouco realizouse ningunha detención da organización na clandestinidade”, si figura que se abriron dúas dilixencias de investigación por delitos de terrorismo “gallego” e unha por enaltecimento do terrorismo en base ao artigo 578 do código penal en relación a “Resistencia Gallega” (sic).
PROPAGANDA
A Fiscalía, ante a evidencia da ausencia de actividade, pon énfase na propaganda. Mesmo deduce que “apréciase unha maior radicalidade” e “determinación de uso da violencia contra as persoas como arma política lexítima”.
En que se basea esta suposta radicalización dunha organización que nunca atentou contra ningún individuo? A Fiscalía alude a “A Fouce. Voz da Resistencia Galega”, unha páxina que se pode atopar na “web oscura”, esa parte de Internet accesíbel mediante navegadores anónimos especiais como Tor.
Tamén alude a que en maio de a banda publicou un boletín, suponse que escrito, baixo o título de “A guerrilheira”, que sería a súa segunda edición.
Con todo, a Fiscalía saca peito e di que os “adeptos” a RG perderon convicción ante o arresto e fortes penas as que foron condenados os seus “responsables”. Segundo a súa opinión, a banda armada realizou 37 accións na súa historia.
