A ex conselleira Mosquera volve á sanidade pública tras ser apartada por Feijóo en 2015
O seu sucesor no cargo, Jesús Vázquez Almuíña, asinaba o pasado 21 de xaneiro o novo posto de Rocío Mosquera como xerente de Galaria. Facíao dous meses despois de anunciar o seu nome e antes de ter iniciado o proceso público de selección.
- O Sergas xustifica que o cargo da ex-conselleira Mosquera en Galaria é "provisional"
- Vázquez Almuíña ve "unha aposta segura" a designación de Rocío Mosquera como directora de Galaria polo seu "prestixio"
Por Galicia Confidencial | Compostela | 05/02/2018 | Actualizada ás 14:00
O Diario Oficial de Galicia (DOG) do pasado 22 de xaneiro recollía o nomeamento de Rocío Mosquera, ex conselleira de Sanidade, como nova xerente da empresa pública sanitaria Galaria. Un nomeamento polémico que o seu sucesor no cargo, Jesús Vázquez Almuiña, fixo xa público o pasado 1 de decembro, sen que se tivera iniciado o proceso público de selección.
O posto estaba vacante desde que, en novembro, pasado Povisa, un centro privado, fichou á anterior xerente de Galaria, María Luisa Brandt, que levaba oito anos neste posto e que pasou a ocupar unha praza de xerente do hospital concertado que estaba vacante desde hai 21 anos.
Foi cando entón Sanidade decidiu recolocar a Mosquera en Galaria, a quen Feijóo apartou da Consellería tras as polémicas xurdidas antes e despois da apertura do Álvaro Cunqueiro e as masivas protestas contra a xestión sanitaria da Xunta en 2015. Acontecía o pasado 1 de decembro, cando se anunciaba a convocatoria pública para cubrir esa praza e, ese mesmo día, Jesús Vázquez Almuíña xa dicía a persoa que o ía ocupar; Rocío Mosquera.
NOMEADA ANTES DE CONVOCARSE A PRAZA
Aínda que o proceso de selección é por designación directa, coa publicación deste anuncio no Diario Oficial de Galicia (DOG) aínda o 15 de decembro, abríase un prazo de quince días laborais para que os interesados presentasen as súas candidaturas. Un proceso que se pechou hai unha semana coa súa publicación no DOG.
Por iso, o PSdeG esixiu "explicacións urxentes" ao Goberno galego por saltarse "todos os procedementos naturais, democráticos, limpos e de transparencia dunha administración". O portavoz de Sanidade no Grupo Socialista, Xulio Torrado, cualificou de "chapuza intencionada" o "salto procedimental". O deputado socialista criticou a "vulneración deliberada" de todas as garantías de limpeza do procedemento co obxecto de "cernar os dereitos das persoas a presentarse a esta praza", por moito que a elección posterior sexa por libre designación.
GALARIA
A Empresa Pública de Servizos Sanitarios Galaria foi creada en 2008 substitución do Instituto Galego de Medicamento Técnico (Medtec), unha entidade que creou o Goberno de Fraga en 1994 para xestionar certas unidades médicas dúas hospitais de Vigo e Ourense e para asesorar ao Sergas na compra de tecnoloxía e nos concursos públicos.
A pesar de que cando foi creado o PPdeG denunciou que se trataba dun “novo chiringuito” do goberno bipartito, o certo é que os populares utilizaron este novo órgano para “enchufar” a dirixentes populares o ex altos cargos tras a vitoria de Feijóo en 2009.
