Por E.P. | Santiago de Compostela | 15/02/2018 | Actualizada ás 13:20
O alcalde de Santiago, Martiño Noriega, enmarcou "dentro da sátira e a crítica" o pregón do humorista Carlos Santiago no Entroido de Compostela, así como "dentro dos límites do humor", logo das crítica recibidas polo PP de Zaragoza e de Compostela, e a propia Igrexa católica, polo que consideran un "acto de desagravio" ao Apóstolo e a virxe do Pilar.
"Moita xente está a falar pero pouca xente tivo oportunidade de escoitar o pregón de Entroido. Está contextualizado dentro da sátira e crítica dun espazo de Entroido e dentro dos límites do humor, que non sempre teñen que gustar, ás veces mesmo molestar", manifestou o rexedor compostelán.
Neste sentido, Noriega insistiu en que o pregón, criticado por representantes do PP e da Igrexa, "está contextualizado dentro dunha onda represiva que tenta regular a liberdade de expresión e os dereitos fundamentais". "E que eu, desde o Concello, non estou disposto a alimentar", apostilou.
Neste sentido, defendeu que "a persoa que fixo o pregón neste caso é unha persona con moito vínculo ao mundo do teatro e ten unha longa traxectoria". "Estase a criminalizar un pregón nun contexto do que é o Entroido e a sátira e a crítica. Paréceme terriblemente perigoso", subliñou.
"Eu non vou ser cómplice do que entendo que é unha manipulación e que, mesmo, pode levar a situacións que vivín estes días desde esta polémica", manifestou, para engadir que desde o mércores recibiu "ameazas de morte", a pesar de non ter nin asistido ao pregón, así como "a propia persoa vinculada ao mundo do teatro".
"ENTENDER OS CONTEXTOS"
"Fago un chamamento a entender os contextos, a entender o humor, a entender as sensibilidades, todas as que sexan, e a entender a que no Entroido se critque a este alcalde, a relixión ou a outras cousas porque somos os que estamos no día a día e forma parte da expresión do pobo no momento do Entroido", reivindicou.
"Non vou facer outra declaración que poida alimentar algo que vai máis aló de sensibilidades", abundou, para comentar que "aos que impulsan isto lles gustaría regular todo, até a expresión do Entroido". Respecto diso, lembrou que "na Ditadura era o único espazo en liberdade para que o pobo se expresase". "Non vaiamos converter o Entroido no único espazo sen dereito á crítica na democracia", aseverou.
Neste sentido, resaltou que "Santiago é un espazo de liberdades e de expresión cultural e de liberdade de expresión no contexto do Entroido", ao ser cuestionado sobre se o Concello coñecía de antemán o texto do pregón. "Cónstame que o que se está dicindo en moitos casos é falso", apostilou.
Finalmente, preguntado sobre se tivo contacto co Concello de Zaragoza a raíz do malestar expresado, o alcalde de Santiago admitiu que se lles "pediu información". "E dixémoslles que defendan á Pilarica por enriba de todo. E que non se preocupen por nós, que somos homes e mulleres concienciados na trincheira para aguantar calquera tipo de situación", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.