"Dende residuos de ENCE, até chapapote do 'Prestige' e lixo urbano" na mina de Touro

"Dende residuos de ENCE, a contedores de chapapote do Prestige, residuos urbanos e vertedoiro 'municipal', ou até o intento de enterramento de reses mortas durante a crise das vacas tolas, os terreos da antiga mina de Touro parecen dar cabida a todo aquelo que noutro sitio non interesa". Este é o panorama que denuncia a Asociación Aldea Viva, que vén de presentar un escrito dirixido á Consellería de Medio Ambiente para denunciar a xestión que están a facer no lugar as empresas de valorización desta mina.

Aldea Viva insta á Consellería a "cumprir as súas obrigas e coñecer que residuos se verten nos terreos da mina de Touro". Faino mediante un escrito no que solicita á Xunta que requira á empresa TEN, S.L. e aos demais operadores a documentación que acredite, a través dos seus libros e rexistros, os residuos que depositaron na zona, facendo mención ao Decreto 59/2009 da Xunta de Galicia, polo que se regula a trazabilidade dos residuos, e que obriga aos xestores que realicen operacións de almacenamento, valorización ou eliminación, a levar un rexistro documental dos residuos producidos e/ou xestionados.

"A día de hoxe, calquera que se achegue ás extensas áreas da antiga explotación mineira nas que se depositan os supostos tecnosoles pode atopar a simple vista nesa mestura todo tipo de restos plásticos ou envases mesmo de medicamentos. En épocas de choiva os lixiviados destes materiais aos ríos é constante; e os cheiros permanentes", describen os denunciantes, que recordan que, "co tempo, acabaron instalándose aí empresas como Tratamientos Ecológicos del Noroeste S.L. (TEN) e outros operadores que se autodenominan «empresas de valorización», que entre outros producen os denominados tecnosoles”.

Aldea Viva lembra á Consellería de Medio Ambiente a natureza da Lei 22/2011 de Residuos, que establece os principios da política de residuos e a protección da saúde humana e o medio ambiente por parte das autoridades, para que non se xeren riscos para as augas, o aire, o solo, nin se causen incomodidades por malos olores ou ruídos.

Neste contexto, e tendo en conta que segundo os propios datos das empresas, estas recepcionan milleiros de toneladas de residuos e de que se están substanciando xa varias denuncias, insta a Medio Ambiente a que inicie a inspección da zona de verteduras dos residuos para comprobar se se están a cumprir as obrigas dos xestores relativas ao almacenamento, mestura e envasado dos mesmos, (artigos 18 e 20 da Lei 22/2011), e que así mesmo, se aplique no seu caso o réxime sancionador ao abeiro da Lei 26/2007 de Responsabilidade Medioambiental e cos principios de que “quen contamina, paga”.