Temas: ARBO LAMPREA

Arbo presume de lamprea cunha ampla oferta de actividades

Esta fin de semana, o Concello de Arbo celebra a corenta e tres edición da Festa da lamprea, o seu produto máis prezado e coñecido a nivel nacional. As actividades divulgativas e festivas empezan o 27 coa inauguración da Arbomostra.

Por X.M. Fernández | Arbo | 26/04/2018 | Actualizada ás 16:00

Comparte esta noticia

A prestixiosa Arbomostra, Feira Agroindustrial e Artesanal da Bisbarra do Condado-A Paradanta, abre o ciclo de actividades e contará cunha importante representación de adegas acollidas á D.O. Rías Baixas. Ademais de coñecer as últimas novidades do sector agroindustrial poderase aproveitar este encontro para a degustación de lamprea e viño a prezos populares e tamén se poderán observar lampreas vivas en viveiros instalados para a ocasión.

Presentación da Festa da Lamprea en FITUR. Fonte: Concello de Arbo
Presentación da Festa da Lamprea en FITUR. Fonte: Concello de Arbo

A inauguración oficial terá lugar ás 17.30 h. con pasarrúas musical posterior e xa ás 20.30 h a Gala da Lamprea no Auditorio do Centro Multiusos de Arbo. Amenizará o evento Andrea Pousa e o Bruxo Queiman. Xa pola noite, concerto de Pelepau na Praza do Mercado e a orquestra Olympus na Praza do Consistorio.

O sábado 28 é o día do Xantar da LVIII Festa da Lamprea onde se dá a coñecer este afamado produto e os viños da zona. Este tradicional xantar, que ten lugar no restaurante “Os Pirús”, é o acto central do evento e sitúa no ano 1961 a orixe desta celebración converténdoa na festa gastronómica máis antiga de Galicia. Esta xuntanza de veciños, restauradores e propietarios de adegas supuxo a primeira edición coa intención final de exaltar lamprea e os viños. Dende aquela Arbo celebra de forma ininterrompida esta festa, a máis importante do ano para a vila e co distintivo de Festa de Interese Turístico Nacional.

Na programación da fin de semana destaca a variada oferta musical coa presenza de numerosas bandas de música, charangas e agrupacións folclóricas. A Banda de Música Municipal de Arbo fará un pasarrúas e posterior concerto o sábado 28 na Praza Consistorio ás 19.30 h.

O domingo, día de peche da Festa da Lamprea, ademais de charangas e agrupacións tradicionais haberá unha actuación de Andrea Pousa e o Bruxo Queiman en Arbomostra arredor das 19.00 h. e exhibición do grupo de baile Megadance de Arbo na praza do Consistorio ás 20.30 h.

Festa da Lamprea 2017. Fonte: Concello de Arbo
Festa da Lamprea 2017. Fonte: Concello de Arbo

Para amenizar as verbenas de sábado e domingo interesantes orquestras e concertos dos grupos Supernatural e X-Matone o sábado e Tekila o domingo.

A programación completa e detallada está disponible na web do concello.

Temas: ARBO LAMPREA
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta