Galicia recibirá case 25 millóns para financiar medidas de desenvolvemento rural, agricultura e vedas de pesca

O Ministerio de Agricultura, Pesca e Alimentación e os representantes das comunidades autónomas acordaron repartir durante a celebración este luns da Conferencia Sectorial de Agricultura e Pesca máis de 234,6 millóns de euros para financiar medidas de desenvolvemento rural, agricultura e vedas de pesca. De todo este montante, Galicia recibirá case 25 millóns. En concreto, aprobáronse intervencións de desenvolvemento rural contempladas no Plan Estratéxico Nacional da Política Agraria Común (PAC) e distintas actuacións en materia de competitividade e calidade da produción e dos mercados agrarios e do Programa Comunitario de Apoio ás Producións Agrarias (Posei) de Canarias. 

Tamén se inclúen o programa escolar para o fomento do consumo de froitas, hortalizas e leite e o financiamento das axudas para compensar as paradas temporais da frota pesqueira no Cantábrico, golfo de Cádiz e o Mediterráneo. Desta forma, o crédito principal, por importe de 158,2 millóns de euros é para o financiamento de intervencións do Fondo Europeo Agrícola de Desenvolvemento Rural (Feader) recollidas no Plan Estratéxico da Política Agrícola Común (PAC) 2023-2027, que foi autorizado xa polo Consello de Ministros. Galicia recibirá, desta partida, uns 21,8 millóns. 

A sectorial, que estivo presidida polo ministro Luís Planas, deu 'luz verde' á distribución territorial de catro créditos para o financiamento de diversas liñas de actuación en materia de calidade e competitividade das producións e os mercados, por un importe total de 30,2 millóns de euros. Pola súa banda, a Intervención Sectorial Apícola (ISA) recibirá unha dotación de 4,3 millóns de euros para paliar as debilidades estruturais do sector e reforzar a súa competitividade.

Mentres que a liña orientada á calidade das variedades vexetais e á certificación dos materiais de reprodución está financiada con preto de 1,7 millóns de euros. Esta actuación permite a execución de ensaios agronómicos en todo o territorio nacional para avaliar o comportamento e o valor agronómico das novas variedades vexetais, requisito imprescindible para a súa inscrición no Rexistro de Variedades Vexetais. Respecto da gandaría, autorízase un crédito de 1,4 millóns de euros destinados ao fomento das razas autóctonas españolas, en apoio ás asociacións de criadores recoñecidas polas comunidades autónomas e outros 1,4 millóns de euros ao control oficial do rendemento leiteiro.