A demanda de empresas de roza dispárase a poucos días de que acabe o prazo para as franxas de seguridade

Particulares, comunidades de montes e axentes forestais coinciden coa Fegamp en que é "imposible" ter limpas as leiras o 31 de maio

Por E.P. | SANTIAGO DE COMPOSTELA | 27/05/2018 | Actualizada ás 11:35

Comparte esta noticia

A demanda de empresas que realizan traballos forestais en Galicia, entre eles de roza de leiras e tallas, disparouse nas últimas semanas, a escasos días de que, o próximo 31 de maio, termine o prazo para que estean limpas as denominadas franxas de seguridade de 50 metros ao redor de núcleos urbanos e edificacións illadas.

Trabajos de limpieza forestal en Galicia
Trabajos de limpieza forestal en Galicia | Fonte: Europa Press

Varios responsables de pequenas empresas consultadas por Europa Press dan conta deste crecemento da demanda, que nalgúns casos é de máis do dobre que a recibida por estas datas o ano pasado, e que todos eles atribúen á obrigación legal e a unha maior "concienciación" por parte de particulares e comunidades de montes.

Con todo, outras compañías detectan simplemente un "murmurio" e un aumento das solicitudes de orzamento, pero non tanto unha maior concreción na execución de rozas e tallas. A este respecto, comunidades de montes denuncian "unha confusión tremenda" e, como xa advertiu o presidente da Fegamp a semana pasada, ven "imposible" ter lista todo este labor a semana que vén, o xoves 31, cando expira o prazo.

O mesmo opinan particulares, a totalidade dos encargados de compañías de traballos forestais consultados e até os axentes forestais e ambientais de Galicia, que este mesmo xoves saíron ás rúas a manifestarse por unhas mellores condicións laborais, ao asegurar que a Administración vincula co control destas franxas unha proposta de incremento das súas horas de traballo.

"IMPOSIBLE ATENDER TODA A DEMANDA"

A limpeza de leiras é unha tarefa que na comunidade galega asumen habitualmente os propietarios ou que, en todo caso, se computa como economía mergullada ao pagar o dono a un coñecido ou ao recorrer a un dos moitos anuncios que é fácil atopar, por exemplo, a través de portais web como milanuncios.

Esta realidade coñécena os que están ao fronte de empresas de traballos forestais, como Javier Couto, encargado de Desbroces Lamas, en Vedra (A Coruña). Con todo, en declaracións a Europa Press, Couto asegura que a súa compañía se atopa "ao 200%" xa que "non se dá feito" ante a elevada demanda de rozas, "imposible de atender".

No seu caso, contratou a tres persoas máis e o cadro de traballadores ascende agora a 11 persoas. "E non teño a máis porque non atopamos xente", afirma. Calcula que o aumento do volume de negocio nestas datas con respecto a 2017 foi da contorna dun 80%. "Empezou hai un mes, parece que a xente esperou ao último día e agora que empezaron a chegar as notificacións é cando se preocupa", explica.

O prezo por limpar unha leira é moi variable (a media oscila entre os 8 e os 10 céntimos por metro cadrado) e depende xa non só do tamaño senón da vexetación existente e da posibilidade de acceder a ela con maquinaria. Desbroces Lamas actúa na provincia da Coruña pero tamén na de Pontevedra, sobre todo centrado na comarca de Santiago. Se "o normal" noutras épocas do ano é "facer dous ou tres servizos" ao día, nestes momentos está a asumir uns 10 ou 15, segundo indica o seu encargado.

"ESTAMOS DESBORDADOS"

Quen tamén sente "desbordado" ante o aluvión de peticións é José Antonio Rivas, O Portela, responsable dunha pequena empresa agroforestal que desenvolve os seus traballos na zona de Ourense.

Leva un mes "notando máis demanda" tanto de curta de piñeiros como de roza. "Estamos desbordados", destaca, antes de sinalar que tamén recibe estes días a chamada de autónomos para ver se lles pode "botar unha man".

Para dar unha idea de cal é a situación, Rivas apunta que lle están "regalando" o piñeiro, posto que outras persoas que, como el, dedícanse á limpeza de leiras, "non dan a basto" e como saben que tamén vende a madeira para leña ou serradoiros, cédenlla.

Xunto a el conta cun empregado e un autónomo que manexa o tractor. "Estamos a empezar nunha chea de leiras porque unha vez que empezas o prazo prolóngase; a idea é quitar o máis próximo ás vivendas", expón. Cunha carga de 10 ou 12 montes para cortar (talla de piñeiros a maioría), afirma que para as leiras nin leva a conta, de tantas que son, e estima que "polo menos" ten para dous meses e medio "ocupado", "máis as rozas" e despois a venda da madeira. "Estou a facer 10-12 horas diarias", resume.

"UN PEQUENO MURMURIO"

Para José Manuel Touceda, xerente de Emdesfor, situada en Barro (Pontevedra), tamén é "totalmente imposible atender a demanda" para quitar "tremenda" cantidade de biomasa que implica ter limpas todas as franxas de seguridade de Galicia.

Aínda que si observa que se está "limpando máis" e que a xente está "inqueda", cun "murmurio" sobre se haberá ou non sancións, este empresario (atende a particulares pero tamén a empresas e comunidades de montes) di ter "o mesmo" traballo que hai un ano.

"Algún concello chamou para facer unha talla preto dunha casa, pero foron dous piñeiros puntuais", engade. Polo demais, na área do centro da provincia pontevedresa, entende que hai "tranquilidade absoluta" e que "se cadra a partir do 31 de maio" os veciños si empezan a actuar.

"ATA QUE CHEGUEN As MULTAS"

Miguel Fernández, de Corbelim, en Castro de Rei (Lugo), tamén cre que "ata que cheguen as multas" non vai haber un verdadeiro movemento para combater os incendios forestais. "Chaman moito para pedir orzamento, iso si que o notei", comenta, antes de alertar que, aínda así, "a xente aínda non tomou moita conciencia" sobre esta problemática, a pesar da vaga de incendios do pasado outubro, que cercou numerosas vivendas e até núcleos de poboación.

Ao seu xuízo, "falta moitísimo" por facer e tamén por parte dos municipios, que "como son votos en contra, non se meten". Neste punto difire co resto de empresarios consultados, que valoran que houbo "moitas charlas informativas" para trasladar as obrigacións que a lei fixa desde 2007 pero que desde este ano a Xunta trata de facer cumprir con maior afán.

"MAIOR E MELLOR DISPOSICIÓN"

De feito, fontes da Consellería de Medio Rural indican que están a percibir "unha maior e mellor disposición por parte dos propietarios forestais". "Consideramos que as últimas reformas legais introducidas para fomentar e facilitar estes labores, xunto ás medidas de divulgación e concienciación, están a dar os seus froitos", resalta o departamento.

Neste escenario, os axentes forestais e ambientais (tanto os sindicatos como a asociación profesional) inciden en que a norma, que lles outorga funcións de control e información das franxas, vén de lonxe (máis de 10 anos).

Pon o foco, neste sentido, na problemática das leiras cuxo dono non é coñecido, posto que para esa supostos a Xunta habilitou a posibilidade de expropiación. Para iso é precisa unha tarefa administrativa (de apertura de expedientes) para a que os concellos aseguran non ter medios.

Desde outro punto de vista, o presidente da Organización Galega de Comunidades de Montes, Xose Alfredo Pereira, lamenta a "confusión tremenda" que supuxo "a modificación do modificado do modificado", tendo en conta que o actual Goberno cambiou a lei de incendios en varias ocasións e iso implica "un barullo".

Das 140 comunidades que engloba esta asociación, en Pontevedra e a comarca do Barbanza, afirma que "todas están a iso", con diferentes grao en canto á limpeza efectiva dos montes. Algunhas teñen persoal cualificado para facer estas tarefas e outras contratan a empresas.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Gamela

Disfrazada de loita contra os incendios esta "normativa" deixará Galicia sen protección vexetal e se ninguén o remedia en menos de 10 anos esta terra será un DESERTO grazas á avaricia de madereiras e papeleiras apoiadas polo goberno de Feijoo, e o peor deste conto é que ecoloxistas, ambientalistas e demais opositores agora parecen estar dacordo con ARRASAR GALICIA !!!