Por E.P. | SANTIAGO DE COMPOSTELA | 20/07/2018 | Actualizada ás 20:34
Un grupo de militantes e responsables políticos do BNG presentaron este venres un escrito na sede da Real Academia Española (RAE), en Madrid, no que esixe á institución unha "desculpa" por "deturpar" os topónimos de Galicia. E é que, segundo explicou a deputada nacionalista no Parlamento autonómico Olalla Rodil, a lei de normalización lingüística de Galicia foi aprobada hai 35 anos por unanimidade na Cámara autonómica. Precisamente, esta norma sinala no seu artigo 10 que "a única forma oficial" da toponimia do país é a galega, ademais de que "estas denominacións son as legais para todos os efectos".
A pesar deste marco, o Bloque denunciou que a institución que rexe o galego Darío Villanueva mantén unha "actitude de deixamento e de falta de respecto" tanto ao texto legal como ao idioma da Comunidade. Segundo Rodil, "a Academia española leva vulnerando esa lei desde hai moito tempo". A mostra "máis recente", prosegue, produciuse nas redes sociais da institución, cando en xuño recomendou, a través da súa twitter oficial, o uso do topónimo castellanizado 'Sangenjo' "fora de usos oficiais".
Ademais, o BNG realizou esta denuncia "ante a pasividade absoluta por parte de quen deberían ser --ao seu modo de ver-- os primeiros valedores da lingua", tal e como esgrimiu a parlamentaria en referencia velada á Xunta e á Real Academia Galega (RAG). "Por iso esta iniciativa, para deixar claro que non imos permitir nin unha soa falta de respecto máis", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.