Por E.P. | SANTIAGO DE COMPOSTELA | 07/09/2018 | Actualizada ás 14:15
A deputada de En Marea no Parlamento galego e coordinadora nacional de Esquerda Unida, Eva Solla, asegurou que a súa formación "está aberta ao diálogo con todos os axentes" da confluencia co obxectivo de "chegar a acordos" e "resolver as diferenzas", e desexou que o plenario transcorra "de maneira positiva".
Así o afirmou na rolda de prensa convocada este venres no Parlamento, ao ser preguntada polos medios de comunicación polo seu posicionamento sobre os asuntos que vai abordar o Consello das Mareas, entre os que está a elaboración do calendario que marcará a renovación da dirección do partido rupturista.
Deste xeito, Solla apuntou que, "como noutras ocasións", Esquerda Unida "espera que o transcurso dese plenario, e se realmente se renova esa dirección de En Marea, sexa de maneira positiva".
Así mesmo, lembrou que o seu grupo político "está aberto ao diálogo con todos os axentes", e indicou que Esquerda Unida se sentou a participar na mesa da confluencia impulsada por Compostela Aberta "ao igual" que está "aberta" a falar "con En Marea ou con calquera axente, dentro do marco da confluencia, para chegar a acordo".
"Queda moito traballo por diante, hai municipais, hai xerais pronto ou cando toca e deberiamos, dentro da mellora desas condicións, chegar a acordos e tentar resolver as diferenzas de maneira normal entre as distintas organizacións", manifestou a coordinadora nacional de Esquerda Unida.
Por iso, insistiu en que en Esquerda Unida están "abertos ás reunións e ás convocatorias que fagan as diferentes organizacións políticas", tamén da "propia En Marea". "Non nos negamos a falar con absolutamente ninguén e nós mesmos pedimos noutras ocasións reunións para aproximar posicións, é o normal", asegurou Solla.
PARTICIPACIÓN NO PLENARIO
Por outra banda, preguntada sobre se a formación que lidera ten intención de acudir ao plenario, Solla explicou que "se está falando de cales serían esas condicións óptimas" e "tamén debería estudarse cando é, se se fai un traballo de presentación de documentos ou cal é a proposta e como se expón".
Debido a iso, asegurou que "non se pode saber" se Esquerda Unida participará no plenario "ata que se reúna hoxe (este venres) o Consello das Mareas" e "se mire en que condicións se vai dar tanto o plenario como as propias primarias e a asemblea que decida organizar En Marea".
"Dende logo, seguimos traballando, neste caso como cargos públicos, os que si o somos, e nunca ocultamos as diferenzas que tiñamos e como se xestionaron", sinalou a coordinadora nacional de Esquerda Unida.
Respecto diso, engadiu: "Cremos que existe a oportunidade de resolver (as diferenzas) mediante ese diálogo, veremos cales son as condicións e como podemos axudar e participar para que se resolvan esas diferenzas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.