Beiras visitará a Oriol Junqueras e Raúl Romeva na cadea
Estará acompañado por Antón Sánchez e o obxectivo é expresarlle a solidariedade ao conxunto de presos políticos e exiliados cataláns “inxustamente perseguidos por impulsar o referendo do 1 de outubro de 2017”.
Por Galicia Confidencial | Compostela | 30/10/2018 | Actualizada ás 13:20
Beiras acudirá a Cataluña e, desta volta, non será para participar en ningún acto político, senón para visitar aos dous dirixentes de ERC presos, Oriol Junqueras e Raúl Romeva. O encontro terá lugar o vindeiro 10 de decembro na prisión de Lledoners onde os dous dirixentes políticos permanecen en prisión preventiva á espera de xuízo.
O encontro, ao que tamén acudirá Antón Sánchez, pretende mostrar a solidariedade de Anova cos dirixentes políticos de formacións legais presos para que poidan realizar o traballo político nas rúas e nas prazas, e tamén nas institucións nas que foron electos, como é o caso do dirixente de ERC Oriol Junqueras. “Entendemos que o feito de que sigan en prisión preventiva é unha mostra máis da deriva autoritaria que atravesa aos poderes do Estado español diante das demandas democráticas postas enriba da mesa por boa parte da sociedade catalá”, apunta a formación nun comunicado.
Anova Irmandade Nacionalista insiste na súa defensa da autodeterminación e, polo tanto, do proces catalán. “O Estado español debera recoñecer antes ou despois o que fixeron xa Canadá ou Reino Unido: o de entender que os conflitos políticos no século XXI teñen que dirimirse abrindo as urnas, e non poñendo freos á democracia”, sinala. Así, lembra que imaxes como a das cargas policiais nos colexios electorais nese histórico 1-O forman parte da historia máis negra do Réxime do 78 e “son impropias de calquera democracia”.
Por iso, din ver con preocupación determinadas afirmacións dos voceiros da dereita española que non descartan a opción de ilegalizar partidos políticos independentistas. “Este tipo de afirmacións evidencian unha concepción cativa da democracia, que non acepta a existencia dun marco de respecto dos nosos dereitos sociais e nacionais e que mesmo pon en perigo dereitos e liberdades civís consagrados no propio ordenamento xurídico vixente”, engade.
