Detidos 160 "procesados rebeldes" no 2018 só en Pontevedra
Ponteareas, Poio e Sanxenxo foron os concellos nos que máis actuacións se desenvolveron baixo ordes de busca, localización e detención. A semana pasada, a Garda Civil acometeu outras dúas intervencións deste tipo na provincia.
Por E.P. | SANTIAGO DE COMPOSTELA | 14/01/2019 | Actualizada ás 12:43
Durante o ano 2018, a Garda Civil detivo só na provincia de Pontevedra a 160 "procesados rebeldes", é dicir, persoas sobre as que pesaban distintas ordes xudiciais para a súa localización ou detención.
Segundo a información facilitada este luns polo Instituto Armado, os municipios onde se rexistraron o maior número de actuacións foron Ponteareas, con 15 detidos; Poio, con 13; e Sanxenxo, con 12.
Mentres, a Garda Civil localizou e detivo durante a pasada semana a catro persoas que foron detidas, ao estar reclamadas por distintas autoridades xudiciais.
A primeira das detencións levouse a cabo a pasada semana por efectivos do Posto da Garda Civil do Grove, onde foi localizado J.C.F., de 48 anos, en virtude dunha orde de ingreso en prisión dimanante do Xulgado do Penal número 4 de Pontevedra.
Ao día seguinte, segundo relatou a Benemérita, foi arrestado en Moaña T.M.B., veciño de León, de 47 anos, que foi presentado no xulgado de Instrución de garda de Cangas. Sobre el recaía unha orde xudicial de busca, detención e presentación do Xulgado de Instrución número 3 de Valladolid.
OUTROS DOUS ARRESTOS
No entanto, o pasado venres, día 11, practicáronse dúas novas detencións: unha delas en Mos, C.F.D.C.M., de 49 anos, reclamado por un dos xulgados de Ponteareas; e a outra no Porriño, A.T.F., de 18 anos, requisitoriado polo Xulgado de Instrución número 1 da mesma localidade.
Entre os labores habituais da Garda Civil, recorda este corpo de seguridade, "figuran os de manter e restablecer a orde pública, previr e evitar a comisión de delitos e deter a delincuentes e persoas requisitoriadas", é dicir, os "procesados rebeldes" sobre os que se ditara unha orde xudicial de busca, localización e detención, xa sexa para ser presentados ante a autoridade que os reclama ou para que ingresen en prisión.
