Unha investigación xenética podería explicar a existencia de mutacións raras en poboacións dalgunhas zonas de Galicia

Científicos das universidades de Santiago de Compostela e Oxford analizaron mostras de ADN de máis de 1.400 persoas para xerar o primeiro mapa xenético a escala fina de España e comprender os impactos da migración na poboación actual. En Galicia foi posible identificar grupos de individuos xeneticamente similares en escalas moito máis precisas.

Por Galicia Confidencial | Santiago de Compostela | 01/02/2019 | Actualizada ás 12:57

Comparte esta noticia

Un novo estudo sobre a distribución xenética de máis de 1.400 individuos de toda España demostra que os patróns xenéticos en individuos modernos foron moldeados polos movementos de poboación dos últimos mil anos. O traballo de investigación foi desenvolvido por investigadores das universidades de Santiago de Compostela e Oxford (Reino Unido) e os resultados acaban de ser publicados en Nature Communication. E mostra que nalgunhas rexións existen patróns discernibles de diferencias xenéticas entre individuos que viven a unha distancia de dez quilómetros, informa a USC.

Detalle dos distintos agrupamentos xenéticos identificados ao longo do territorio peninsular
Detalle dos distintos agrupamentos xenéticos identificados ao longo do territorio peninsular | Fonte: USC.

Ademais dos patróns a grande escala identificados, en rexións como Galicia foi posible identificar grupos de individuos xeneticamente similares en escalas moito máis precisas –de menos de 10 quilómetros de distancia nalgúns lugares–, como ao longo de vales dos ríos.

Estas agrupacións tan localizadas predín a probable existencia de mutacións raras localizadas xeograficamente, incluídas as causantes de enfermidades.

O catedrático da USC Ángel Carracedo explica que "as extensas diferencias xenéticas observadas a pequena escala en Galicia poderían explicar por que algunhas enfermidades con compoñente xenética parecen concentrarse en áreas concretas”.

O equipo internacional analizou mostras de ADN de máis de 1.400 persoas para xerar o primeiro mapa xenético a escala fina de España e comprender os impactos da migración en España na poboación actual.

A investigación identifica diferencias xenéticas máis fortes no eixo imaxinario que vai do este ao oeste da Península, así como mostras de movementos históricos de poboación que transcorren de norte a sur en España.

A autora principal do estudio, Clare Bycroft, explica que estes patróns reflicten a historia singular da Península Ibérica e, tendo en conta unicamente o seu ADN, apuntan "a agrupación de individuos modernos cuxos límites xeográficos coinciden estreitamente cos de distintos reinos, cos seus respectivos idiomas, presentes hai máis de 500 anos".

A partir do exame dos patróns de intercambio de ADN entre individuos da Península Ibérica e doutras partes do mundo, o equipo  de xenetistas puido identificar a presenza de ata un 10% de ascendencia do noroeste de África en habitantes modernos da Península, incluíndo individuos de Portugal. O equipo de investigadores estima que este ADN data de arredor dos anos 860-1120, un período de migración de poboación procedente da actual Marrocos durante o dominio musulmán de España. Máis recentemente, producíronse migracións de persoas de ascendencia vasca cara o sur atravesando a Península.

Historicamente, seguindo a chegada de aproximadamente 30.000 combatentes, tamén se rexistrou unha migración civil dun número descoñecido de persoas, estímase que principalmente foron bérberes procedentes do norte de Marrocos que se instalaron en diversos puntos da Península Ibérica. As análises previas darían conta de que este movemento tería producido un “impacto xenético substancial e xeneticamente variable”.

Ademais, os resultados acadados implican a predominancia de ADN procedente do noroeste de África durante a emigración. No conxunto do territorio español, a presenza de ancestros de orixe africana ocorreu en todos os grupos, se ben os niveis son menores no País Vasco e na zona correspondente co espazo no que se asentaba a Coroa de Aragón durante o século XIV.

En conxunto, estes resultados indican que os movementos poboacionais de séculos de antigüidade asociados coa conquista musulmá e a posterior Reconquista deron forma á xenética moderna da Península.

O interese de estudar esta rexión de Europa, radica en opinión dos autores do traballo no feito de que “a Península Ibérica é lingüisticamente diversa, ten unha historia demográfica complexa e é única entre as rexións europeas por ter un período de séculos de dominio musulmán”. 

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 3 comentarios

3 uu1

Dinheiro malgastado duma universidade pública!! Que vai ser o próximo? Cita do Sempre em Galiza de Castelao “Para nós, os galegos, afeitos a percorrermos o mundo e a convivir con tódalas razas, o nacionalismo racista é un delito e tamén un pecado. Endexamais medimos os diámetros do noso cráneo, nin llo medimos a ninguén para ser ademitido na nosa comunidade”

2 Joám

Acho a redação desta nova neste meio e noutros também é certamente confusa. Segundo as minhas leituras e referências de pessoas especialistas na matéria, tenho entendido que, claro que na Galiza partilhamos ancestros genéticos comuns com bereberes e touaregs, mas não é que eles vinheram ao noroeste da península. Mais bem ao invês. Do refúgio glaciar cantábrico no norte da penísula ibérica, onde chegaram hai 18.000 anos aproximadamente populações do norte europeu fugindo do gelo, muitos cruzarom depois o estreito de Gibraltar para o norte de África. Como na Galiza temos uma menor heterogeneidade ancestral que noutras partes da penísula, aquí conservamos esses velhos genes dos antigos europeus que partilhamos com os "netos" desses mesmos europeus que foram para o norte da África. Tudo isto tem interesse histórico mas vaia por diante que não deve ser instrumentalizado por nenhum movimento racialista em um sentido o noutro.

1 Sentidiño

Qué nacionalista española é a universidade! Por qué o mapa de Portugal está en branco? Non interesan as migracións galaicas cara ao sur?