Por Galicia Confidencial | SANTIAGO DE COMPOSTELA | 07/02/2019 | Actualizada ás 16:49
O Comité de Empresa denuncia irregularidades no envío dun equipo informativo a Venezuela. No momento en que regresaban a Galicia, o xornalista Luis Ramos foi retido cinco horas no aeroporto de Caracas. As autoridades venezolanas comprobaron que se trataba dun informador, pero que non cumprira cos requisitos legais “para desenvolver a súa actividade en moitos países do mundo”.
A representación dos traballadores e traballadoras da CRTVG denuncian irregularidades por parte dos xestores do ente público, por ter enviado un xornalista a un país estranxeiro “sen ter solicitado previamente o visado de traballo no consulado” de Venezuela. A solicitude do visado de traballo ademais garante a seguridade persoal do xornalista para realizar o seu traballo, máis aínda nun país en conflito.
O Comité de Empresa xa solicitou explicacións á dirección da Corporación así como que se depuren as responsabilidades necesarias. Tamén esixen que a directora de Informativos da TVG non oculte “esta grave irresponsabilidade do departamento de producción informando só parcialmente das circunstancias que levaron á retención dun compañeiro”. Para o Comité “é impresentable que se terxiverse este feito con intencionalidade política”, para segundo apuntan “informar de xeito interesado sobre a situación que atravesa Venezuela”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.