O concurso de carteis escolares sobre as Letras Galegas xa ten gañadores

O CEIP Xesús San Luís Romero, de Carballo (A Coruña), e o IES Álvaro Cunqueiro, de Vigo, gañaron o concurso de carteis que organizan as consellerías de Cultura e Educación co gallo das Letras Galegas.

En concreto, o centro carballés alzouse co premio na categoría de infantil e primaria coa mostra 'Antonio Fraguas, con A de agarimo e F de folclore', mentres o instituto vigués leva o galardón no apartado de secundaria polo traballo 'Insuela'. Cada un dos centros recibirá 2.000 euros en metálico, mentres os profesores implicados terán unha certificación de premio de innovación educativa equivalente a 20 horas de formación.

Ademais, Política Lingüística distribuirá as exposicións coas súas guías didácticas por máis de 2.000 puntos de Galicia e o exterior para dar a coñecer a figura de Antonio Fraguas. Nas próximas semanas serán publicados tamén no Portal da Lingua Galega.

O xurado encargado do Concurso-Exposición Letras Galegas 2019 destaca do traballo do centro de Carballo que é "un harmonioso conxunto de carteis no que coidado estético se combina co emprego das tecnoloxías da información e da comunicación", mentres que da proposta do instituto vigués valora a súa "perfección técnica".

Antón Fraguas, homenaxeado do Día das Letras de 2019. RAG