A USC tamén se desfai dos seus investigadores
Un total de 17 investigadores están a piques de quedar en paro a pesar de que a Universidade de Santiago comprometeuse a ofrecerlles contratos estables baixo o programa de captación de persoal investigador Isidro Parga Pondal (IPP).
Por Galicia Confidencial | Compostela | 05/12/2011 | Actualizada ás 00:22
A Universidade de Santiago de Compostela é un dos focos máis importantes de investigación de Galicia. Un dos programas pioneiros no fomento da investigación é o Programa Isidro Parga Pondal, a través dos que a USC captou persoal investigador en forma de bolsas-contrato que tras un período de tempo deberían rematar en contratos estábeis se superan a correspondente avaliación.
Pero, cinco anos despois, 17 investigadores da USC levan recibindo bolsas-contrato da Xunta, á espera de obter un contrato definitivo. Desde entón publicaron 331 artigos en revistas científicas, rexistraron 9 patentes, dirixiron 13 teses doutorais e coordinan como investigadores principais 16 proxectos que captaron un financiamento de 1 millón de euros. Entre o 15 e o 20% destes fondos van parar directamente ás arcas da USC.
Rematan en Nadal
As súas bolsas-contrato finalizan o 28 de decembro, pero había un compromiso de estabilización a través de convocatoria de prazas por por parte da USC para todos os investigadores que obtivesen unha avaliación positiva no programa. Sen embargo, o equipo de goberno da USC non ten intención de cumprir ese acordo de contratar aos que teñan superado a finais do mes de Nadal a avaliación pactada.
O reitor xa anunciou que a USC só ten capacidade de contratar a 5 dos 17 e carga toda a responsabilidade na Xunta e no anterior equipo reitoral por encher as facultades con profesores de máis.
Campaña
Unhas explicacións que non convencen aos investigadores afectados que comezaron xa as mobilizacións e unha campaña activa na rede para pedirlle á Reitoría da USC que recapacite e asuma eses contratos porque contan co apoio económico da Xunta. "Axúdanos a esixir ao Reitor da Universidade de Compostela que manteña o seu compromiso convocando as prazas necesarias para aqueles investigadores que participaron con éxito neste programa", apuntan os afectados nunha misiva na que piden o maior número de apoios para remitila ao
"Non serven as escusas económicas e estruturais expostas. Calquera problema estrutural de distribución de persoal xa existía en xuño, cando se dicía que as limitacións serían unicamente económicas. En canto a estas, son claramente superables, xa que a Xunta xa ten comprometidos durante 3 anos máis os contratos das persoas que consigan a estabilización", indican nesta carta que xa conta con 2.000 apoios. Podes sumarte á campaña aquí.
