O PSOE consegue unha vitoria histórica en Galicia
Os socialistas obteñen 10 escanos e sácanlle case 5 puntos ao PP en Galicia. Ciudadanos obtén os seus mellores resultados e derrota importante de Vox e do BNG que non cumpliron expectativas. Batacazo de En Marea.
Por Galicia Confidencial | Compostela | 28/04/2019 | Actualizada ás 21:31
O PSOE gañaría as eleccións xerais en Galicia con case o 85% do voto escrutado. Os socialistas obterían 10 escanos, e o PP baixaría de 12 do 2016 aos 9 de 2019.
Con este resultado, os socialistas acadarían unha vitoria histórica en Galicia que o achegan as mellores épocas do PSOE de Felipe González. Pola contra, os populares recibirían un duro castigo. Baixarían máis de 13 puntos con respecto a 2016.
Pola súa banda, En Común Unidas Podemos obtería 2 escanos. Os electores castigarían tamén a formación de Iglesias en Galicia tras a ruptura de En Marea. Conseguría só a metade dos votos que acadou hai tres anos. Uns resultados que son testemuñais para En Marea.
Pola súa banda, Ciudadanos, con dous escanos, obtería o seu mellor resultado en Galicia. Con dous puntos máis que en 2015, e máis do 10% dos votos, sacarían escano en Pontevedra e A Coruña.
Os grandes derrotados en Galicia, ademais do batacazo monumental de En Marea, serían Vox e o BNG. A formación de ultradereita e os nacionalistas obteñen pouco máis do 5% dos votos.
Pontevedra sería a provincia na que os socialistas vencerían con máis folgura. Alí sacarían tres escanos, fronte aos dous do PP e 1 de En Común e 1 de Ciudadanos.
Na Coruña, socialistas e populares repartirianse tres cada un, En Común outro e Ciudadanos outro. E en Lugo e Ourense, tamén habería reparto entre PP e PSOE con dous cada un.
