Ana Pontón presume do "modelo municipal de éxito do BNG"

A portavoz nacional do BNG, Ana Pontón, proclamou no arranque da carreira cara ás urnas do próximo 26 de maio que a formación nacionalista "vai a por todas" e chamou á mobilización cidadá co obxectivo de "estender o modelo municipal de éxito" a toda a xeografía galega. "Máis BNG!", proclamou.

O Bloque Nacionalista Galego elixiu A Coruña, co seu candidato á Alcaldía, Francisco Jorquera, para abrir esta contenda electoral que encara, en palabras de Pontón, "co obxectivo de sumar concelleiros e concelleiras, gañar máis alcaldías para formar máis gobernos do BNG e, por suposto, para avanzar para ter máis peso político en todas as cidades". Pontón salientou que o Bloque, tras as eleccións xerais, está "á alza" e isto permitirá aos nacionalistas "estender por Galicia un modelo municipal de éxito, que demostrou que funciona, capaz de transformar en positivo vilas e cidades para mellorar a vida das persoas".

"Máis BNG nos concellos, máis concellos gobernados co modelo municipal do Bloque, que demostra que, cando confiamos nas posibilidades do país e temos políticas propias, avanzamos e logramos grandes cousas", salientou a líder nacionalista, quen chamou á mobilización. Pontón dixo que o Bloque está "na boa dirección", pero "hai que seguir sumando máis galegos a este proxecto, explicándolles a alternativa para os concellos e para Europa, porque para vencer hai que convencer". "Presentamos un proxecto sólido, unido e renovado e pedimos o voto coa certeza de que imos dar o mellor de nós e estar á súa altura", remarcou.

"COMPROMISO DECIDIDO"

No tradicional acto de apertura, tomou a palabra o candidato á Alcaldía da cidade herculina, Francisco Jorquera, quen mostrou o seu "decidido compromiso" coa a cidade. Así, subliñou o feito de que a carreira cara ás urnas comeza cun BNG "reforzado na Coruña", tras os resultados obtidos nos comicios xerais.

O mesmo domingo electoral celebraranse as eleccións europeas. Así, no acto de apertura tamén participou a cabeza de lista do BNG, Ana Miranda, quen certificou que a "papeleta do BNG o 26M é garantía de eficacia na defensa dos intereses de Galicia a través dunha voz propia na Eurocámara". Por iso, a eurodeputada apelou a "aglutinar no BNG todo o voto de país para conseguir unha representación reforzada a través de escano propio, con voz nacionalista e de esquerda en Bruxelas".