Por Europa Press / Redacción | SANTIAGO DE COMPOSTELA | 22/05/2019 | Actualizada ás 17:27
A Confederación de Empresarios de Galicia (CEG) tachou de "ataque intolerable" as críticas dos dirixentes políticos de Podemos Isabel Serra e Pablo Iglesias ás doazóns sanitarias da Fundación Amancio Ortega.
Fronte ás críticas de Serra e Iglesias, os empresarios galegos defenden o labor de Ortega con "a dotación desde 2015 de 300 millóns de euros e a instalación de tres centenares de equipos de última xeración para mellorar o diagnóstico e o tratamento oncolóxico".
Os dirixentes de Podemos declararon que unha "democracia digna" non debería aceptar doazóns de alguén que "elude" impostos. E a CEG reproba tales declaracións dos políticos da formación morada.
Así mesmo, a CEG recalcou que "a doazón é un dereito recollido expresamente na lexislación española". Por iso, "as desafortunadas declaracións supoñen un ataque intolerable á liberdade das empresas para reverter os seus beneficios, ou parte dos mesmos, en doazóns que beneficien o conxunto dos cidadáns, máxime cando se trata dun dos alicerces básicos do Estado de benestar como é a sanidade pública".
Por último, a patronal considerou como "exemplar" o labor de Ortega e lembrou que a Organización de Nacións Unidas (ONU), a través de Axenda 2030, situou por primeira vez o sector privado como axente do desenvolvemento sustentable. Segundo a ONU, as achegas das empresas deben estar ao mesmo nivel que as realizadas polos estados e a sociedade civil, polo que cualifica á Fundación Amancio Ortega como un "referente claro neste sentido".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.