Un informe do Defensor del Pueblo cuestiona a actuación da administración sobre a reapertura da mina de Touro

A asociación ecoloxista Tralapena emitiu este domingo un comunicado anunciando as conclusións da Oficina del Defensor del Pueblo sobre o proxecto mineiro de O Pino-Touro. A asociación ecoloxista sinala que o informe da oficina que dirixe Francisco Fernández Marugán, apunta unha serie de elementos que cuestionan o modelo de reapertura presentado por Cobre San Rafael e Atalaya Mining.

Así, o informe do Defensor del Pueblo destaca que “a modificación da extensión e delimitación dos terreos para a explotación  mineira, levaría de maneira necesaria a modificación da concesión e non unha simple modificación do proxecto”. Seguidamente, o documento lembra a necesidade de que Augas de Galicia elabore un informe de “medios hídricos” que permita a actividade extractiva, sen prexuízo para o consumo de auga para as poboacións de arredor. “É preciso elaborar este informe (de medios hídricos) de xeito previo á resolución que dicten para a concesión mineira, para ter coñecemento de se existen ou non recursos dipoñibles para novos usos mineiros”, sentenza o documento.

Un punto importante é que “a Consellería de Economía non enviou ao Defensor del Pueblo a documentación que acredite os actos administrativos ditados para modificar o obxecto do aproveitamento (da mina), e tampouco explica o que ocorreu entre a finalización da actividade da explotación de cobre en 1987 e o comezo da actividade do aproveitamento do entullo remanente”. Isto evidenciaría actividade na mina seis meses despois do cesamento de actividade extractiva.

Doutra parte, o informe do departamento que dirixe Fernández Marugán declara que “en conclusión, a Administración actuou de maneira deficiente, ben porque non declarou a caducidade da explotación, se os traballos foron interrompidos nun prazo de tempo superior ao que estaba autorizado, ou ben por non sancionar o titular da explotación por non presentar planos de labores anualmente (e por non ter declarado a caducidade en caso de reincidencia), se a explotación estivo en funcionamento”.

Sobre as filtracións de augas contaminadas “a contaminación da auga parece o problema máis grave e aínda así a explotación está funcionando sen ter os permisos esixidos pola lexislación de augas, pois aínda están en trámite varios procedementos de regularización”. Logo contradí á Consellería de Economía cando afirmaba que non había obriga de restauración dos terreos, por non haber daquela lexislación que así o dixese. Neste sentido o Defensor del Pueblo sinala no seu informe que “ningunha norma ampara a produción inxustificada de danos ao medio ambiente como consecuencia da actividade mineira”.

Augas de Galicia “tampouco indica se as verteduras irregulares cesaron actualmente” sinala o informe segundo a Asociación Tralapena, ademais de sinalar que apunta “a ausencia dun plano aprobado de actividades extractivas en Galicia”.