A Audiencia de Pontevedra condena ao Santander a pagar as costas dos demandantes polas accións do Popular

A sección sexta da Audiencia Provincial de Pontevedra, con sede en Vigo, ditou unha sentenza na que estima un recurso de apelación interposto por demandantes que reclamaron xudicialmente a devolución do diñeiro investido en accións do Banco Popular en 2016.

En primeira instancia, un xulgado vigués condenou ao Santander (que adquiriu o Popular en 2017) a devolver aos demandantes, representados polo letrado Xoán Pérez-Lema, os case 8.800 euros das accións do Popular que adquiriran, pero non impuña á entidade o pago das costas procesuais, por apreciar "dúbidas de feito e dereito" sobre esa cuestión.

A xuíza entendeu que o Banco Popular ofreceu "unha información parcial" sobre a súa solvencia, co fin de captar clientela para a operación de aumento de capital, unha operación que non reportou os "resultados desexados" porque a insolvencia real era superior "á anunciada e aparentada". Así, anulou a compra das accións e condenou ao banco a devolver o diñeiro, pero acordou non facer unha especial declaración sobre as costas procesuais, polas "dúbidas".

Agora, na súa resolución, o tribunal provincial establece que non observa as dúbidas fácticas e xurídicas "que a sentenza de instancia proclama pero que non acaba, por certo, de concretar".

Por todo iso, estima o recurso e condena ao Banco Santander a pagar as costas do proceso, nunha sentenza que, ademais, discrepa do criterio da Audiencia da Coruña, que en marzo pasado rexeitou impor a este banco as costas por non existir aínda unha doutrina unificada do Tribunal Supremo.

Sucursal, banco Popular