Por Europa Press / Redacción | SANTIAGO DE COMPOSTELA | 04/07/2019 | Actualizada ás 12:15
O coordinador da Federación Rural Galega (Fruga) en Lugo, Elías Somoza, afeou ao presidente da Xunta, Alberto Núñez Feijoo, que dixese que non é "preocupante" a redución de granxas lácteas ao defender que hai que dirixirse cara a "explotacións máis intensivas". "A nós parécenos que cantas máis explotacións desaparecen en Galicia, as que resisten quedan moito máis precarias", alertou o dirixente agrario.
En relación coas declaracións do titular do Goberno galego esta semana nunha visita ás novas instalacións da industria Larsa no municipio lucense de Outeiro de Rei, Somoza avisa de que o lácteo "ten futuro desde unha produción baseada na terra, nunha produción que asente poboación no rural".
"Si estamos a falar contra o despoboamento do rural, se queremos un medio rural vivo e se falamos da lexislatura do rural o importante é fixar poboación, e para iso ten que haber actividade no campo e unha das principais actividades é a produción de leite", deixa claro.
Cre que a concentración de granxas "vai contra o que necesita o sector lácteo galego, que pasa por un maior número de explotacións baseadas na terra e que contribuiría a fixar poboación no medio rural". Somoza censurou que para a Xunta "o sector estratéxico que hai é a produción de eucaliptos para darlle materia prima barata a Ence", fronte a un sector lácteo galego que, ao seu xuízo, "ten futuro".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.