De resignación e dominación

George Lakoff afirma que "O enmarcado ten que ver con elixir a linguaxe que encaixa na túa visión do mundo. Pero non só ten que ver coa linguaxe. O primeiro son as ideas. E a linguaxe transmite esas ideas, evoca esas ideas”.

Hai que sinalalos

O día 21 de outubro, Galicia elixe representantes parlamentarios. O resultado obtido nos comicios lexitimará ou castigará a acción dos populares nas institucións: dende os concellos pequenos, que debaten sobre as súas competencias, autonomía e validez, ata as grandes decisións de Estado, como a de dobrar o xeonllo ante o Bundesbank.

Os títulos de Feijóo

Ante o caos económico xeneralizado, as imposicións da Unión Europea e a axenda de recortes,o Presidente Feijóo vese comprometido a un dobre esforzo no embuste. Debe presentarse ante os votantes galegos como o verso solto do seu partido, o líder rebelde que desafía a imposición dunhas siglas neoconservadoras. Á vez, ha de exhibirse ante o seu xefe de partido como o delfín do conservadorismo, unha moa máis do aparato. Nesta encrucillada, encontramos o pragmático presidente da Xunta, preocupado por medrar en Madrid. Experto na pose e o autobombo, a Feijóo só lle importa Feijóo e, a imaxe dos grandes rexentes, el atesoura e coida con celo materno os títulos que vai adquirindo.

A política, os medios de comunicación e a prostitución da verdade

Nos tempos que corren de incerteza persoal e institucional, hai moitas palabras que cambiaron o seu significado. Un piso, pasou de ser un fogar, a un activo tóxico. Un banco evolucionou de cómplice, de compañeiro de esmorgas, a prestamista enfurecido. O futuro pasou de ser unha oportunidade a unha ameaza. Nesta catarse social na que levamos embarcados dende outono de 2008, o que non mudou morreu. Unha da máis destacable variación é a percepción que ten o cidadán dos seus representantes institucionais, os políticos.