Por Galicia Confidencial | A Coruña | 15/11/2019 | Actualizada ás 12:14
«O noso planeta», o novo proxecto expositivo de Afundación, a Obra Social de Abanca, foi recibido na Sede Afundación da Coruña cunha gran acollida por parte do público. Máis de 2.000 persoas visitaron xa a nova aposta cultural da entidade galega, presentada "en primicia mundial", e que pretende ser reflexo do seu "compromiso coa sostibilidade e a protección do medio ambiente". A mostra está baseada na recoñecida serie homónima producida por Netflix, que bate todos os récords de audiencia da súa programación.
O obxectivo da Obra Social de Abanca é, segundo a entidade, "transcender o estático concepto de mostra tradicional, apelando á participación e implicación da sociedade nas diferentes actividades que deseña con cada proxecto", como, neste caso, o maratón de proxeccións do documental O noso planeta.
Proxectaranse os oito capítulos que o conforman, en sesión continua entre as 12.00 e as 20.00 h, no Auditorio da Sede Afundación. As sesións serán os días 16, 23 e 30 deste mes, 7 e 21 de decembro e o 2, 3, 11 e 18 de xaneiro. A entrada é libre e gratuíta.
A EXPOSICIÓN «O NOSO PLANETA»
Estruturada en oito bloques, esta mostra incide na importancia do coidado e do respecto cara ao medio ambiente como única vía para unha vida sostible. A partir do documental que a plataforma audiovisual Netflix produciu para a televisión, e para o que conta coa locución de David Attenborough en inglés e de Penélope Cruz en castelán, e cuxa coordinación correu a cargo de Alastair Fothergill e Keith Scholey, Afundación, Afundación, e Planeta, editora do catálogo, presentan esta exposición en primicia mundial.
O "compromiso" de Afundación coa sostibilidade e o respecto ao medio ambiente motivou a realización desta mostra, xa que "un dos principios fundamentais e transversais a toda a entidade reside, precisamente, en traballar consonte un modelo máis sostible que condense a aspiración a unha vida máis digna en todos os sentidos posibles", explican os promotores da mostra.
Deste xeito, engaden, "Afundación e Abanca son entidades comprometidas cos Obxectivos de Desenvolvemento Sostible da ONU e procuran, nos seus diversos ámbitos de actuación, divulgar o principio de sostibilidade como motor das actividades que se realizan".
«O noso planeta» permanecerá aberta ata o próximo 8 de febreiro de 2020, de 10.00 a 14.00 h, para colectivos escolares e grupos previa reserva, no que xa se apuntaron máis de 3.500 escolares, e para público xeral en horario de 14.00 a 21.00 h, de luns a venres, e de 11.00 a 21.00 h, os sábados e festivos. Todos os mércores e venres, non festivos, realizarase un percorrido guiado ás 19.00 h de balde.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.