O Parlamento quere que as festas galegas sexan declaradas BIC

A oposición apoia a iniciativa defendida polo PP, pero subliña que sería desexable "máis concreción" e que non se cinga só ás "verbenas".

Por Europa Press / Redacción | SANTIAGO DE COMPOSTELA | 26/11/2019 | Actualizada ás 15:03

Comparte esta noticia

Todos os grupos que conforman o arco parlamentario galego apoiaron unha iniciativa impulsada polo PPdeG na que se insta á Xunta a que as festas parroquiais de Galicia sexan recoñecidas como Patrimonio Cultural Inmaterial na súa categoría de Ben de Interese Cultural (BIC).

A encargada de defender a iniciativa no marco da Comisión de Educación e Cultura foi a deputada do PP Encarnación Amigo, quen erixiu as festas parroquiais en "unha tradición cultural viva e arraigada ao longo do tempo" que contribúe de forma decisiva a conformar "a identidade e a cohesión social" dos galegos que viven no rural.

E é que en Galicia, segundo os populares, prodúcese "un fenómeno particular e único", con fins de semana "con máis de 200 festas".

Amigo aludiu tamén ao "encomiable traballo" de Asociación Galega de Orquestras na promoción e divulgación da festa popular galega e tamén á campaña de recollida de firmas para que sexan recoñecidas como Patrimonio Inmaterial, ou ao 'Tributo á Verbena' desenvolvido en Mondoñedo en abril.

Tamén resaltou outras características particulares como a figura do 'ramista' --cada membro da comisión de festas que organiza e pide recursos para preparala-- e incidiu en que os populares queren apoiar a reivindicación da Asociación Galega de Orquestras.

APOIO, PERO DEMANDA DE MÁIS CONCRECIÓN

Toda a oposición deu o seu apoio á iniciativa dos populares, pero durante o debate os distintos portavoces remarcaron que sería conveniente que na proposta houbese "maior concreción" sobre as celebracións que se recoñecen.

"A formulación é excesivamente aberta", remarcou Paula Vázquez Verao (do Grupo Parlamentario Mixto), quen ironizou con que, á marxe de respectar as festas parroquiais --sinalou que ela mesma foi 'ramista' na súa parroquia, por exemplo--, igual "habería que declarar BIC" a quen "resisten" no rural "a pesar das políticas do PP".

Olalla Rodil (BNG) incidiu en que non se recoñeza só á verbena e as orquestras. "Sen restarlles valor, hai festas parroquiais que teñen unha maior diversidade", reivindicou, antes de incidir en que as parroquias son os elementos realmente característicos e importantes na comunidade.

Luca Chao (Grupo Común da Esquerda) recoñeceu a iniciativa do PP e manifestou o seu desexo de que non quede "nun xesto para a galería". Finalmente, Concepción Burgo (PSdeG) tamén incidiu na necesidade de facer un censo coas festas en cuestión e "delimitar do que se fala".

"Falamos de dinamización do rural e de diversas festas parroquiais, entre as que pode haber verbenas, 'mallas' ou festas gastronómicas. É un apoio máis", resolveu a parlamentaria popular Encarnación Amigo.

Verbena en Galicia co Combo Dominicano. COMBO DOMINICANO
Verbena en Galicia co Combo Dominicano. COMBO DOMINICANO

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Kimmel

Definitivamente imos ó precipicio. Agora resulta que un botellón onde Pili Pampín perpetra as súas coplas andaluzas ou o Combo Dominicano as súas latinadas atronadoras, onde o español sobrancea nun 95% do tempo, onde Galiza non está representada (e con sorte) cuns gaiteiros pola mañá, onde todo consiste en macropaparotadas e sobreabusos como talar carballeiras pra que pase o camión da orquestra ou tire cruceiros centenarios, todo esto metece ser declarado BIC e ata o BNG aplaude cas orellas??? Metecemos desaparecer como nación. Somos unha ración de churrasco forestal de eucaliptos e Operación Triunfo.