Por Europa Press / Redacción | SANTIAGO DE COMPOSTELA | 04/01/2020 | Actualizada ás 18:43
A asociación profesional Tesgalicia condenou este sábado o "abandono no que se atopan desde hai anos" os xestores de emerxencia da central telefónica do 016 en Galicia.
Segundo Tesgalicia, a situación viuse "agravada nos últimos meses polos problemas internos e económicos" que alega a empresa Grupo Norte, que ten subcontratado este servizo de atención e xestión urxente sanitaria da Xunta.
Esta compañía "está a someter" aos profesionais a unha "tensión laboral insustentable" pola "constante incerteza de non saber se cobrarán as súas nóminas, a pesar de estar a traballar", segundo denunciou a asociación profesional.
A Xunta de Galicia ten externalizado este servizo a través de Grupo Norte que, tras "aceptar esa concesión por unha cantidade á baixa temeraria, decide non pagar correctamente aos seus traballadores", segundo sinala Tesgalicia, que asegura que as negociacións entre esta empresa e o Goberno galego "teñen como reféns aos de sempre, os traballadores".
Condenou tamén "a huída e conivencia" da Xunta, a quen consideran "primeira e última responsable de non velar para que este servizo sexa público e de calidade".
Ademais, Tesgalicia lamentou que os xestores das emerxencias sanitaras "son considerados vendedores telefónicos", polo que están adscritos a un convenio colectivo que "nin chega a ser mileurista", a pesar de que a súa xestión é un "alicerce fundamental" para a asistencia sanitaria urxente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.