O PP defende a "axilidade" da Xunta na aprobación dos ERTE tras as críticas da oposición
PSdeG e Galicia en Común defenderon a xestión do Goberno cos ERTE e criticaron as "trabas" da Xunta na súa tramitación.
- PSdeG e En Común critican á Xunta por atrasar ERTEs e poñer en perigo o sustento de miles de persoas
Por Europa Press / Redacción | SANTIAGO DE COMPOSTELA | 16/04/2020 | Actualizada ás 19:55
O secretario xeral do PPdeG, Miguel Tellado, puxo en valor a "axilidade" do Goberno galego na aprobación dos expedientes de regulación de emprego (ERTE) para "garantir a viabilidade das empresas galegas e o mantemento de miles de postos de traballo".
Así se pronunciou o número dous dos populares galegos este xoves, xornada na que o PSdeG e Galicia en Común defenderon a xestión do Goberno cos ERTE e criticaron as "trabas" da Xunta na súa tramitación despois de que o executivo que encabeza o popular Alberto Núñez Feijóo ampliase de cinco a dez días o prazo de tramitación dos expedientes.
Fronte a iso, Tellado asegurou que a Xunta está a resolver "dentro de prazo" todos os expedientes de regulación temporal de emprego presentados, dos case o 90% "xa se resolveron".
Así mesmo, sinalou que foi o Ministerio de Traballo quen, o pasado 28 de marzo, habilitou unha ampliación de cinco a dez días hábiles do prazo máximo de resolución e notificación dos ERTE para que as comunidades puidesen analizar tecnicamente cada un deles.
Segundo apuntou Tellado, con esta ampliación á que se acolleu a Administración autonómica, Galicia está a garantir que o proceso quede máis blindando e conte con maior seguridade xurídica, tanto para as empresas como para os traballadores, xa que se está revisando cada un dos expedientes.
"Ao dispor de dez días, haberá máis resolucións informadas polos técnicos da Administración autonómica e, por tanto, menos expedientes que vaian adiante por silencio positivo. Isto facilita que os expedientes sexan tramitados da forma o máis garantista posible", manifestou.
Para Tellado, o verdadeiro problema dos expedientes de regulación temporal está en que centos de persoas afectadas non percibiron por parte do Goberno a prestación a pesar de que a súa ERTE foi aprobado pola autoridade laboral. "Un problema", destacou, "do que xa leva advertindo a Xunta desde hai tres semanas".
