Os sindicatos advirten da "sobrecarga de traballo" en Correos polas normas para o voto

Piden a contratación de persoal para atender as eleccións, que xa supoñen unha apertura de oficinas con horario máis amplo desde o luns.

Por Europa Press / Redacción | SANTIAGO DE COMPOSTELA | 29/05/2020 | Actualizada ás 19:54

Comparte esta noticia

Correos convocou para o vindeiro martes os representantes sindicais para abordar as novas normas que afectan os carteiros nos comicios galegos para o próximo 12 de xullo e que, segundo a resolución da xunta electoral central, inclúen que o persoal de repartición poida recoller nos domicilios os sobres coas papeletas dos cidadáns que así o decidan.

Oficina de Correos.
Oficina de Correos.

Os representantes sindicais están "preocupados pola sobrecarga de traballo" que vai supor este sistema e, aínda que defenden a valía do persoal da empresa pública para realizar este servizo, advirten das dificultades para facer repartición e recollida de papeletas, á vez que se cumpren coas obrigacións diarias. Sumado todo iso a que nas eleccións xerais pasadas duplicouse o número de solicitantes de voto por correo, o que xa supuxo ter que pedir dúas prórrogas para os prazos, polo que nesta ocasión é previsible un maior "colapso" pola situación estival e a pandemia, apuntan.

Nesta liña, o secretario de acción sindical de CGT, Xan Xove, sinalou a necesidade de que haxa unha "contratación masiva de persoal" e apelou a que Correos recibe unha cantidade específica para cubrir os procesos electorais que debe destinarse a este fin.

"É un proceso extraordinario e Correos terá que contratar masivamente", sinalou. Así, explicou que un proceso de entrega está estimado nuns 3 ou 5 minutos por domicilio, se a iso hai que sumar esperar a que o cidadán que o decida emita o seu voto —abra o sobre e elixa a papeleta—, o tempo de espera é incalculable e "pode entorpecer o traballo" diario dos carteiros.

Xove dixo que a "profesionalidade" dos empregados de Correos está "fóra de toda dúbida", pero tamén serían necesarias medidas específicas para garantir que non se mesturen os correos e non haxa problemas cos votos e a súa custodia. Así, mencionou a posibilidade de habilitar caixas de seguridade especiais ou crear un servizo especial no corpo de traballadores de Correos que "só se dedique a isto".

O responsable de Correos de UGT, Manuel Santiago, pronunciouse nunha liña similar, xa que vai supor un traballo extra e unha "responsabilidade engadida". Tras destacar que a xunta electoral "valora o traballo e toma en consideración" a condición de "fedatario" dos traballadores de Correos, sinalou a necesidade de implementar medidas de seguridade.

Pola súa banda, o secretario de Comunicación de CIG Correos, Miguel Núñez Pérez, manifestou que a admisión do voto na porta das vivendas "non é un proceso nada rápido nin áxil e leva, así mesmo, unha exposición en maior ou menor medida de usuarios e empregados". Por tanto, advertiu, deben garantirse "sen menoscabo do requisito secreto de voto".

A este respecto, a CIG lembra que a solicitude de voto por correo no rural podíase prestar con anterioridade desta forma, sendo os carteiros "oficinas ambulantes", unha situación "non exenta de polémica en procesos electorais. O sindicato nacionalista pide que se cubran as vacantes con contratos e e fagan "reforzos" de contratacións de persoal.

HORARIOS AMPLIADOS

Todas estas inquietudes serán expostas na reunión á que os sindicatos foron chamados por parte de Correos o martes que vén, na que, segundo o escrito remitido, abordarase especificamente o acordo da xunta electoral, que se realizou por mor dunha consulta do presidente do ente público.

Con todo, as oficinas principais de Correos xa recibiron instrucións para abrir nun horario máis amplo desde o vindeiro luns: de 8,00 a 21 horas, ininterrompidamente. Ademais, tamén se está expondo a posibilidade de abrir o 24 de xuño, festivo en Galicia.

A xunta electoral central decidiu que todos os carteiros poidan "dar fe" da recepción do voto e outorgoulles a capacidade de recoller nos domicilios os sobres das persoas que elixan exercer así este dereito nas eleccións previstas para o próximo 12 de xullo en Galicia.

Pola súa banda, o presidente da Xunta, Alberto Núñez Feijóo, subliñou que un carteiro é "un funcionario público con absoluta imparcialidade e rigor no seu traballo". "Non hai ningún que se vaia a arriscar a cometer un delito electoral", dixo o mandatario, quen precisamente presidiu Correos en tempos pasados.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta