Gómez-Reino empraza a Caballero e Pontón a presentar un "decálogo" conxunto para dar forza á coalición
Avoga polo tripartido como única alternativa a Feijóo, ó que afea as súas intencións de dar o salto á "política nacional": "se revalida o cargo non completará a lexislatura", asegura.
- Arrinca a campaña da Covid-19: entre un Feijóo que quere ser Fraga e unha oposición que busca un goberno de coalición
- Gómez-Reino: "Galicia terá un goberno do bloque progresista ou de Feijóo e Abascal"
- ENQUISA: Feijóo perde forza electoral no inicio da precampaña
Por E.P. | SANTIAGO DE COMPOSTELA | 26/06/2020 | Actualizada ás 18:41
O candidato de Galicia en Común-Anova Mareas á Xunta de Galicia, Antón Gómez-Reino, convidou a Partido Socialista e BNG a presentar "un decálogo de goberno" para visualizar ante o electorado "progresista" a alternativa ó actual presidente Alberto Núñez Feijóo, ó que acusa de ser responsable de "dez anos de recortes e privatizacións".
Nun almorzo informativo celebrado este venres 26, o candidato da alianza entre Podemos, EU, Anova, Compostela Aberta e Marea Atlántica amosou a súa confianza en PSdG e BNG para abrir un período de "cambio" sostido sobre un "un goberno de tres almas e unha cabeza". Neste aspecto, Gómez-Reino considera necesario constituír o amentado decálogo para marcar as "medidas fundamentais" que servirían de base para ese hipótetico goberno "de cambio".
Xa na precampaña as enquisas publicadas debuxaron como única alternativa ó goberno de Feijóo a conformación dunha coalición a tres na que Gómez-Reino, cuarta forza segundo as enquisas, amosa especial interese. "En Galicia si ou si ten que haber un goberno de coalición", sinalou o candidato de En Común, que destacou a "tradición" de gobernos mixtos na comunidade galega, "algo completamente normalizado" e que sitúa a Galicia "por diante" doutros territorios do Estado "ao nivel de democracias europeas".
"NON REMATARÁ A LEXISLATURA"
Boa parte do tempo do almorzo informativo foi dedicado á análise da xestión da pandemia e a situación económica de Galicia, marcada, segundo Gómez-Reino, pola "inacción" e as "políticas de privatización e recortes" que atribúe a Núñez Feijóo. O candidato de Galicia en Común-Anova Mareas aproveitou a xornada para afear as intencións de Feijóo de "facer política a nivel estatal", razón pola cal, apunta, o candidato popular "non rematará a lexislatura" no caso de que revalide a súa maioría.
