A intención de Adif era botar os vagóns ao Sil, di a Confederación Miño-Sil
O presidente do organismo, que anuncia sancións, negou a operación e considera "sorprendente" o proceder de Adif. O ente ferroviario anuncia a retirada dos vagóns.
- Piden que a Fiscalía investigue a Adif por dano ambiental tras botar un vagón ao Sil
- Adif bota no río Sil os dous vagóns do tren que descarrilou en Sobradelo hai unha semana
Por Europa Press / Redacción | SANTIAGO DE COMPOSTELA | 05/08/2020 | Actualizada ás 18:47
A Confederación Hidrográfica Miño-Sil (CHMS) manifestou este mércores que non deu a súa autorización á manobra para retirar os vagóns do tren accidentado en Carballeda de Valdeorras (Ourense) nos termos nos que o Administrador de Infraestruturas Ferroviarias (Adif) comunicouna o domingo e que iniciou dilixencias previas pola caída á canle do Sil de dous vagóns.
A CHMS explicou este mércores que o mesmo domingo pola mañá recibiuse nas súas oficinas unha chamada do 112 Galicia comunicando a manobra de retirada dos vagóns, na que se pedía autorización para a mesma. A Confederación, relatou o presidente da CHMS, José Antonio Quiroga, respondeu que, "nas condicións nas que o solicitan, non é posible dar autorización".
A proposta era, de acordo co relato da Confederación, "deixar caer" os vagóns cara á canle do Sil para posteriormente retiralos, "dada a dificultade da súa recuperación e por cuestións de seguridade". A CHMS comunicou que a operación non era "viable desde o punto de vista ambiental na forma exposta" e desprazou ao lugar a persoal de vixilancia.
O presidente da CHMS, indicou, nunha comunicación remitida aos medios, que o propio domingo abriuse "unha instrución" que segue en marcha. "Contamos con que, ao final da semana seguinte estea instruído totalmente e incoado o expediente, que ten que pasar por unha sanción económica e, o máis importante, a restitución do dano ambiental causado, incluída a retirada dos vagóns do dominio público hidráulico", afirmou.
Os vagóns estaban na vía desde que o pasado 28 de xullo un tren de mercadorías que circulaba na liña Monforte-Ponferrada descarrilou cando estaba a chegar ao núcleo de Sobradelo, en Carballeda. O domingo, operadores de Adif empuxaron dous vagóns das vías, un dos cales acabou nas augas do río e o outro, envorcado na pendente entre as vías e a canle do Sil.
"SORPRENDENTE ACTUACIÓN"
"O domingo pola tarde, para a nosa sorpresa, atopámonos que a empresa executa a acción de retirada dos vagóns co resultado que coñecemos", agregou Quiroga, que é tamén secretario de Organización do PSdeG, e indicou que ese mesmo día "ábrese instrución" por "tan sorprendente actuación" da autoridade ferroviaria. A caída das estruturas provocou o enlamado momentáneo da auga.
As dilixencias previas determinarán os danos causados ao dominio público hidráulico, indicou a CHMS, que engadiu que os seus servizos técnicos están a facer un seguimento das "posibles afeccións á calidade das augas" con mostraxes periódicas, ademais doutras dilixencias e investigacións e visualizacións de vídeos.
Así, determinarán os danos ocasionados e, "se estes foran constitutivos de infracción da lexislación de augas", procederán á incoación do correspondente expediente sancionador. Das súas investigacións, agregou o organismo, "despréndese que os vagóns serían empuxados de forma intencionada para que se producise a súa caída polo noiro"·
ADIF RETIRARÁ OS VAGÓNS
Por outra banda, o Administrador de Infraestruturas Ferroviarias está a traballar para retirar os dous vagóns que botaron ao Sil e outros dous que quedan na zona tras o descarrilamento, o pasado 28 de xullo, dun tren de mercadorías.
Por este motivo, aínda que restableceu desde as 06,40 deste mércores o tráfico ferroviario, volveu suspendelo ao redor das 14,30 para iniciar as operacións necesarias para retirar os vagóns descarrilados, xa que "será necesario acondicionar a vía para tal fin", sinalaron fontes de Adif.
