Por Galicia Confidencial | Compostela | 17/08/2020 | Actualizada ás 22:00
A pandemia do coronavirus está cambiando moitas cousas, pero o que non cambia é a inxección de diñeiro público en grandes medios de comunicación, mesmo, cun goberno en funcións. Aconteceu antes dos comicios, cando a Xunta de Galicia mobilizou máis de 3.680.000 euros xusto un mes antes da campaña electoral, e acontece un mes despois das eleccións, con outros 385.000 euros cando aínda quedan 15 días para que Feijóo tome posesión como presidente por cuarta vez.
Así, se antes estas subvencións estaban relacionadas con medidas de prevención da Covid-19 e outras foron reactivadas tras paralizarse durante a pandemia, nesta ocasión tamén hai concursos novos e outros reactivados. E, destacan, especialmente, as licitacións que mantén abertas a Consellería de Infraestrutura e Mobilidade.
Este departamento abriu un concurso o pasado 12 de agosto para a xestión da inserción de anuncios oficiais e institucionais da Consellería de Infraestruturas e Mobilidade e as súas entidades adscritas nos diarios oficiais e medios de comunicación durante os anos 2020 e 2021. Un concurso por valor de 96.800 euros.
Tamén esta consellería formalizou o pasado 10 de agosto o contrato polo servizo de seguimento das noticias relativas e de interese para á Consellería de Infraestruturas e Mobilidade durante os anos 2020 e 2021 nos medios de comunicación escritos de ámbito galego e nacional. Un concurso orzamentado, inicialmente, en 36.300 euros. Chama a atención que unha empresa externa se faga cargo destas funcións cando este departamento dispón do seu propio gabinete de comunicación entre cuxas tarefas están, precisamente, coñecer e seguir as informacións que se publican sobre Mobilidade e Infraestruturas.
OUTROS CONCURSOS DESTA CONSELLERÍA
Non son os únicos concursos desta consellería nos últimos meses. Tamén activou o contrato derivado da campaña de “sensibilización cidadá e información en torno á mobilidade e o transporte público 2020“, do “Acordo marco do servizo de elaboración, produción e plan de medios das campañas de promoción dos ámbitos competenciais atribuídos á Consellería de Infraestruturas e Mobilidade e as súas entidades adscritas durante 2019 e 2020“.
Cun orzamento base de licitación de 450.000,00 euros con IVE, o concurso foi activado o 8 de xuño. Dentro deste acordo marco 2019-2020, dotado de 3 millóns de euros, tamén se fechou outro concurso publicitario o 3 de marzo dotado de 600.000 euros.
POLÍTICA SOCIAL
Por outra banda, aínda segue aberto outro concurso da Consellería de Política Social para o desenvolvemento dunha campaña de difusión institucional das políticas sociais da Xunta de Galicia destinadas ó fomento da natalidade no ano 2020 dotado con máis de 251.000 euros. Este concurso foi activado o pasado 20 de xullo, logo de suspenderse pola pandemia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.