Por Galicia Confidencial | SANTIAGO DE COMPOSTELA | 03/09/2020 | Actualizada ás 09:35
Santiago de Compostela contará cun sistema de indicadores para analizar a evolución do turismo nos próximos anos. Así o anunciou a Fundación Santa María la Real del Patrimonio Histórico en relación a un proxecto liderado polo Concello de Santiago a través da área de turismo. A iniciativa, que contará con experiencias en Francia, Portugal, Reino Unido e no resto do Estado terá como obxectivo "entender mellor o comportamento tanto dos visitantes como dos habitantes das cidades patrimoniais do Espazo Atlántico", de xeito que sexa posible "facilitar a súa xestión e lograr un turismo sostible", así como "un mellor fluxo de persoas".
Para chegar a este coñecemento, o proxecto, artellado baixo o nome BODAH (Big and Open Data for Atlantic Heritage), contempla o deseño de solucións tecnolóxicas que permiitrán recompilarán datos de diferentes fontes e "transformaranos en coñecemento práctico". Por agora, o proxecto, que comezou a súa andaina a finais de 2019, xa conseguiu definir un sistema de indicadores propio que determinará que datos se han de medir. Este será aplicado en catro cidades: Santiago de Compostela, San Sebastián, Pau en Francia e Cork en Irlanda.
INDICADORES MODIFICADOS POLA COVID
O sistema de indicadores -30, en total- sobre o cal se fundamenta o estudo responden a "cuestións fundamentais" para a comprensión dos fluxos de persoas, como que lugares son os máis visitados, cantas persoas reciben, como afecta ese tránsito ao sitio en cuestión, etc. Por suposto, tamén poñen o foco na percepción do turista e o habitante e nos efectos socio-económicos do tránsito sobre a cidade.
Segundo destacan dende o proxecto, estes indicadores foron desenvoltos tomando como base un sistema europeo que resultou adaptado, por unha banda, ás características do proxecto e das cidades nas que está previsto intervir. Á parte, apunta, houbo que modelar este conxunto de datos á "situación excepcional xerada polo coronavirus". “O noso reto é afianzar un turismo sostible e mellorar a xestión dos fluxos de persoas nas cidades nas que actuamos, algo beneficioso tanto para o visitante como para os habitantes do destino”, explican os responsables de BODAH, que permanecerá en funcionamento ata o ano que vén.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.