Cs proporá cambiar a lei para que se cumpra o Pacto Antitransfuguismo tras os pactos de varios ex edís

O partido laranxa aposta por castigar o transfuguismo, pero cre que o PP non ten "ningún interese".

Por Europa Press / Redacción | Santiago de Compostela | 06/09/2020 | Actualizada ás 14:13

Comparte esta noticia

Ciudadanos proporá aos demais partidos acordar cambios lexislativos para que se cumpran as medidas do Pacto Antitransfuguismo, tras os casos de Santa Cruz de Tenerife, Málaga, A Coruña e outros municipios onde concelleiros ou exconcelleiros de Cs apoiaron mocións de censura ou alterado as maiorías de goberno incumprindo as directrices do seu partido.

Nalgúns casos, os edís decidiron abandonar a formación laranxa por discrepancias coas liñas marcadas polos seus dirixentes, e noutras ocasións foi o partido o que os expulsou por desobedecer instrucións. O problema para Cs xorde cando estes concelleiros se negan a entregar a súa acta.

Nos últimos meses, Cs viu como os votos dos seus exconcelleiross en varios municipios serviron para cambiar a un alcalde por outro ou para modificar as maiorías políticas. Ocorreu na Coruña, Santa Cruz de Tenerife e Málaga, e tamén en localidades máis pequenas como Cartaya (Huelva), Huércal-Overa (Almería), Benicàssim (Castelló) e Colmenarejo (Madrid).

Nestes lugares, o PSOE ou o PP chegaron a acordos con edís ou exedís de Cs para, grazas aos seus votos, facerse co poder nun Concello ou unha Deputación Provincial. A cambio, os tránsfugas adoitan obter un cargo, garantirse un soldo ou conseguir outro tipo de vantaxes.

REUNIÓN O 21 DE SETEMBRO

Para pór fin a estas situacións, Cidadáns solicitará a súa adhesión ao Pacto Antitransfuguismo e levará varias propostas á reunión que a Comisión de Seguimento celebrará o próximo 21 de setembro, dez anos despois do seu último encontro.

Esta reunión foi convocada polo Goberno, tras un encontro en xullo con todos os grupos políticos con representación nas Cortes Xerais excepto o PP e Vox, que se ausentaron. Previamente, o partido liderado por Inés Arrimadas citouse co PP e o PSOE para convencelos da necesidade de reforzar o acordo.

Os partidos teñen de prazo ata o 14 de setembro para remitir ao Ministerio as súas propostas para actualizar e mellorar o Pacto Antitransfuguismo, subscrito en 1998 e modificado posteriormente en 2000 e 2006.

A alcaldesa, Inés Rei, e o portavoz socialista, José Manuel Lage, nunha reunión coa xa edil de Cs, Mónica Martínez, actual concelleira de Deportes. CONCELLO DA CORUÑA
A alcaldesa, Inés Rei, e o portavoz socialista, José Manuel Lage, nunha reunión coa xa edil de Cs, Mónica Martínez, actual concelleira de Deportes. CONCELLO DA CORUÑA

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta