Lucas Martinón, un "dos homes do presidente" marcha da Xunta despois de 16 anos con Feijóo

O Goberno galego aprobou na súa reunión deste xoves o cesamento de Lucas Martinón Torres, un dos ata agora 'homes fortes' do presidente e líder do PPdeG, Alberto Núñez Feijóo. Martinón é, xunto co secretario xeral de Presidencia, Álvaro Pérez López,  a secretaria xeral de Medios, Mar Sánchez Sierra, e o xefe de prensa do PPdeG, Luis de la Matta, un dos "homes do presidente" e artífice do ascenso fulgurante de Feijóo no PP e na Xunta desde o ano 2005.

Lucas Martinón, ex director xeral de comunicación da Xunta | Fonte: Xunta

Segundo explicou o mandatario autonómico, visiblemente emocionado, o xornalista ourensán cesa a petición propia do seu cargo para emprender un proxecto en comunicación pero á marxe da política.

Nunha rolda de prensa na que Martinón estivo presente, Feijóo remarcou que o seu asesor lle trasladara hai "bastante" tempo a súa vontade de deixar de ser director de Comunicación da Xunta para "iniciar o seu propio proxecto en comunicación fóra da política". "Quedamos en que se ratificaría a principios de novembro, é a súa vontade, o Consello toma nota e eu trasládollo", sentenciou.

"Moitísimas grazas e ata sempre", despediuse, coa voz entrecortada e emocionado, tras recoñecer o traballo dun colaborador que leva 16 anos traballando con el. "Xuntos vivimos a sucesión no PPdeG e case catro anos de oposición moi interesantes. E no ámbito do partido dirixiu o catro campañas autonómicas parece que con éxito. É a decisión irrevogable deste xornalista da que o Consello toma razón", concluíu.

TRAS OS DISCURSOS E ARGUMENTARIOS DE FEIJÓO

Nacido en Ourense, en 1980, Martinón é licenciado en Xornalismo e identifícaselle como a 'pluma' que está detrás de parte de discursos e argumentarios do líder do PPdeG e presidente da Xunta. De feito, Martinón é un dos colaboradores aos que se atribúe un papel chave na estratexia que levou a Feijóo a recuperar a Xunta en 2009, tras estar máis de tres anos á fronte do PPdeG no seu papel como líder da oposición. O propio xefe de filas popular recoñeceu e agradecido publicamente o seu labor en máis dunha ocasión, a última vez este mesmo xoves.

Mesmo antes de asesoralo na oposición, colaborara con el desde o ano 2005, como redactor do gabinete de prensa da Vicepresidencia Primeira e Consellería de Política Territorial, na que recalou Feijóo tras o seu regreso de Madrid nos últimos tempos de Manuel Fraga á fronte do Executivo autonómico.

Cando Feijóo gañou as eleccións situoun como o seu xefe de prensa e en 2013 ascendeuno a director de Comunicación, posto que ocupou ata este xoves, cando o Consello da Xunta aprobou o seu cesamento.