Denuncian un "uso inadecuado" de ambulancias na Coruña con pacientes covid

A CNT iniciou un conflito colectivo polo "uso inadecuado" por parte, segundo sostén, da UTE Servizos Sanitarios da Coruña-Ambulancias María Pita no transporte colectivo "con pacientes Covid ou con patoloxías que deben ir illados".

Nun comunicado, asegura que "os incumprimentos das empresas en materia laboral e de prevención de riscos son constantes". En concreto, alude a un "uso abusivo das ambulancias de transporte non asistencial, sobre todo as ambulancias de transporte colectivo para trasladar conxunta e indiscriminadamente a todo tipo de enfermos". "Sen ter en conta as esixencias específicas de cada un deles", afirma nun comunicado remitido aos medios de comunicación.

A central sindical reclama que estas ambulancias se utilicen "para o transporte colectivo de pacientes a condición de que non revistan enfermidades contaxiosas, segundo o recollido na normativa en materia de transporte sanitario de persoas".

Un traballador sanitario totalmente protexido pecha a porta dunha ambulancia tras recoller a un ancián da residencia de anciáns | Fonte: Carlos Castro - Europa Press