Por E.P. | SANTIAGO DE COMPOSTELA | 16/05/2021 | Actualizada ás 14:48
Un total de 271 concellos galegos, que representan o 85% do total, xa se adheriron ao Pacto Europeo das Alcaldías polo Clima e a Enerxía, coordinado en Galicia pola Xunta. Esta cifra alcanzouse tras 30 novas incorporacións rexistradas nos últimos meses. De acordo con datos da Consellería de Medio Ambiente, Territorio e Vivenda, os 271 municipios que xa participan nesta iniciativa reúnen a un total de 2,2 millóns de cidadáns, un 80% da poboación actual da Comunidade galega.
O Pacto Europeo dos Alcaldes polo Clima e a Enerxía trátase dunha iniciativa que a Comisión Europea puxo en marcha no ano 2008 e que está aberta a todas as cidades e municipios da Unión, para involucrar ás autoridades locais e os cidadáns na conquista dos seus obxectivos.
Nesta liña, o primeiro informe de seguimento da estratexia galega de cambio climático e enerxía 2050, presentado esta semana no Consello da Xunta, desvelou que, con este pacto de alcaldes, acelérase a redución de emisións con "máis de 317 millóns de euros executados de máis de 170 medidas recollidas ata o ano 2023".
De feito, co obxectivo de axudar aos concellos neste reto, a Consellería de Medio Ambiente convocou axudas dirixidas a estas institucións para que elaboren Plans de Acción para o Clima e a Enerxía Sustentable (PACE). As subvencións, sostén a Xunta, contribuíron á presentación de 175 PACE, nos que se identifican en conxunto 170 medidas que se implantarán nos municipios adscritos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.