Por E.P. | Santiago de Compostela | 16/06/2021 | Actualizada ás 17:26
O presidente da Xunta, Alberto Núñez Feijóo, enxalzou o proxecto seleccionado para a reconfiguración do Pazo de Quián --en Sergude, Boqueixón (A Coruña)--, que se converterá no 'Centro de promoción e imaxe dos produtos agrícolas' para reflectir o "modelo a escala" da Galicia rural "ordenada, con produtos agroalimentarios de calidade e cun palntexamento forestal a curto e longo prazo".
O mandatario autonómico participou este mércores na presentación do proxecto 'Buxo', desenvolvido por Jorge Salgado, Celso López, Magdalena Arousa Portela e César Portela e que resultou vencedor do concurso de ideas para reconverter este pazo situado na comarca de Santiago.
A reconfiguración do pazo de Quián de Sergude suporá un investimento de 4 millóns de euros para a posta en marcha deste centro, que comezará coa reforma do Centro de Formación e Experimentación Agroforestal de Sergude, onde 130 estudantes cursan ciclos formativos relacionados co ámbito rural.
Ademais, a actuación tamén contempla a habilitación dunha residencia de estudantes con capacidade para medio centenar de alumnos. Así mesmo, os xardíns o pazo converteranse nun espazo lúdico, onde as 100 hectáreas que o compoñen acollerán unha representación da Galicia rural.
Outra das actuacións será a construción dun edificio sobre a Cruz do Naveiro que, bautizada como 'O Castro', servirá de escaparate para os produtos galegos; á vez que se instalará un centro temático enfocado a que os cociñeiros de Galicia desenvolvan as súas ideas.
Isto verase completado cunha granxa de vacún que acollerá todas as razas galegas autóctonas e instalacións dedicadas a cabalos, porcos, cabras, ovellas e galiñas.
No ámbito da agricultura, haberá tres zonas diferenciadas por tipos de cultivo (horta, cereais e viñedos), mentres que tamén haberá espazo para o sector forestal cun parque que acollerá diversas especies e unha zona de pastos.
Todo iso co obxectivo de que o complexo alcance o "balance cero enerxético" grazas á aposta pola implantación de enerxías renovables.
En resumo, Núñez Feijóo destacou que Quián será "un escaparate" das potencialidades e características de Galicia. "Estamos a falar dun modelo a escala da Galicia rural na que cremos: ordenada, con produtos agroalimentarios de calidade e cun plantexamento forestal a curto e longo prazo", remarcou o presidente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.